Shillong, Lber 30 : Ka Indian Social Responsibility Network (ISRN) ka kynhun kaba ïakhun ban pynshai ïa ki paidbah ba kin mih shakhmat ban ai tika ha ka sngi Balang ka la pyntip ba ki dang don bun bha ki nongkyndong ha ka jylla ki bym pat ai tika.
Katei ka kynhun kaba leit ban pynshai ha ki saw tylli ki distrik jong ka Meghalaya, kata ha Ri-Bhoi,West Khasi Hills, South Garo Hills bad East Garo Hills ka la ong ba ka thong jong ki ka long ban kyrshan lang ïa ka sorkar jylla ha ka jingïakhun ba ki nongshong shnong baroh kin pyndep ïa ka jingai tika ban ïada na ka khlam COVID.
Haba kren bad ki lad pathai khubor, ka team leader jong ka ISRN, ka Dr. Richa Sharma ka la ong, “Ban pynstet ïa ka jingai tika ha kito ki jaka ba duna bha ki nongai tika, ka ISRN ka la mih shakhmat ban kyrshan ïa ka sorkar jylla da kaba leit ban pynsngewthuh bad treilang bad ki bor shnong bad kumjuh bad ki kynhun bapher bapher.”
Katkum ka jingong jong ka, kiba bun ki bym pat ai tika ki dei kito kiba sah ha ki jaka bakham kyndong jong ka jylla bad kito ki bym pat ïoh ka jingshai kaba bniah halor katei ka dawai ïada.
Nalor ka Meghalaya, ka ISRN ka la jied ruh hynriew tylli ki distrik jong ka Nagaland na ka bynta katei kajuh ka phang ban ai tika na ka bynta kito kiba la dei ban ïoh kynthup ïa kito kiba la palat 12 snem.
Ka Dr. Richa ka la ong ruh ba ki kham pynleit jingmut na ka bynta kito ki nongshong shnong kiba don jingshitom, kiba duna ka ïoh ka kot bad khamtam kito kiba sah ha ki jaka kiba kham jynjan ban poi.
La ong ruh ba ka thong jong ka ISRN ka long ruh ban ai jinghikai ïa ki nongtrei ka koit ka khiah, ki frontline workers, nalor ka vaccine on wheel, ka jingkynduh kaba khah khah bad kiba dei ha ka kam la ka long ha ka jylla ne ha ki distrik, nangta ka jingïatrei lang bad ki kynhun bapher bapher kynthup wat ha ki jaka pule ruh.
“Ka thong kaba sah mynta ka long ban pynleit jingmut ruh na ka bynta kito kiba don ha ka thup ba 12-14 snem ryngkat bad kito kiba 14 snem sha jrong ha ka jylla. Da kane ka sienjam, ngi kyrmen ba ngin lah ban kyrshan ïa ka sorkar ban pynstet ïa ka jingai tika ïada COVID khnang ban lah ïakhun ïa ka khlam COVID,” ka la bynrap shuh shuh.
