Nongstoiñ, Lber 30: Ka jingwan sieh mawpud jong ki briew ka sorkar Assam ha ka sngi saitjaiñ jong ka taïew ba la dep ha ki shnong kiba hap ha ka Langpih sector, ka la pynartatien bad pyntharai sniew haduh katta katta ïa ki paitbah kiba shong ha katei ka thaiñ.
U bah P.Nongshlong sordar ka shnong Mawïamsyiem haba pyntip ha u nongthoh khubor, u la ong ba katei ka jingwan sieh mawpud jong ki briew ka sorkar Assam khlem da pyntip sha ki bor pynïaid District jong ka West Khasi Hills ka dei ka kam sop sop bad ka jingthmu kaba sniew. U la ong ruh ba katei ka jingleh jong ki briew ka sorkar Assam ka lah ban pynthud pynban ïa ka jingthmu jong ki ar sorkar ban pynbeit ïa u pud u sam bad ka lah ban wan rah ïa ka jingshongsyier ha ki paitbah nongshong shnong.
U la ong ba naduh u bnai Naiwieng jong u snem ba la dep ki ar ngut ki Myntri Rangbah kata u Conrad Kongal Sangma Myntri Ranagbah ka Meghalaya bad u Himanata Biswa Sarma Myntri Rangbah ka Assam, ki la wan ban pynlong jingïalang ha Langpih ki la dep ong ba baroh ar lïang na Meghalaya bad na Assam kim dei leh kino kino ki kam kiba lah ban wanrah ïa ka jingbymïapher jingmut ne kiba ktah ïa ki nongshong shnong, lait noh ha kaba pyntrei ïa ki kam pynroi na ka bynta ka jingmyntoi ki paitbah, kata ruh da kaba ïa pyntip mar kyllïang hapdeng u DC ka West Khasi Hills bad u DC ka Kamrup.
U bah Nongshlong u la pynpaw ruh ïa ka jingsngew lyngngoh kaba khraw da kaba ong kumno u DC Kamrup um kohnguh ïa ka jingbthah jong u Myntri Ranngbah ka Assam. Lada ka long kumne ka pyni shai ba katei ka jingkren jong u Himanta Biswa Sarma ka dei ka jingkren birïa, katba u Conrad Kongal Sangma pat u pyrkhat ba u kren shisha. Lymda kumta kumno ki tei ki briew jong u ki nud ban wan sieh mawpud haba ki Regional Committee on Border Dispute kiba la thung da ki ar sorkar kim pat sdang wat tang ban jurip ïa ki jaka ruh.
U la ong ba lada ki Regional Committee on Border Dispute, kin dang pynslem bad buhteng ban jurip ïa ki jaka kiba hap ha ka Langpih sector, khlem artatien ka lah ban wanrah ïa ka kynrum kynram kaba jur ha katei ka thaiñ, namar baroh ki nongshong shnong naduh Bagjeng, Nawapara, Dronpara, Mawïamsyiem bad kiwei kiwei ki shnong, kim kwah satia ban leit pynïasoh bad ka Assam.
Kumta lada ka sorkar ka sngewkhïa halor katei ka jingwan sieh mawpud sop sop jong ki briew ka sorkar Assam, ka dei ban bthah ïa ki Chairman jong ki Regional Committee on Border Dispute, ba kin sdang noh ïa ka wat ba ar ban jurip ïa ka Langpih sector, namar lada kan pynslem ka aïom slap ka la poi bad kan wanrah jingeh haba ki leit ban jurip namar kiba bun ki shnong ki dei ki bym pat don surok.
Nalor kata u la ong ba ha u snem ban wan kan don ka Election ha ka jylla, kumta ki lah ban ai daw ba ki la bun kam ha ka election. Kumta ban lait na ka kynrum kynram ki dei ban sdang noh ban jurip khnang ba ki paitbah kin ym rit mynsiem.
