Mawkyrwat, Lber, 30: U bah Renikton Lyngdoh Tongkhar, MLA ka Mawkyrwat bad uba bat mynta kum u Myntri ka tnad umbam umdih bad kiwei jong ka jylla u la ïoh ban ot ribon kum ka dak ban plie paidbah ïa kawei na ki jaka pynlang pisa ka Housing Development Finance Corporation (HDFC) Bank Limited, Mawkyrwat Branch ha South West Khasi Hills District, Mawkyrwat ha ka jingiadonlang ka kong Caramai Kharkongor, IAS, Deputy Commissioner, South West Khasi Hills District, bah W.B Biam, MCS, ADC, Mawkyrwat, Bah. S.C Laloo, MCS, ADC, Mawkyrwat, bah I. Lawryniang, MCS, BDO Mawkyrwat C&RD Block, u Roshan Thapa, Cluster Head jong ka HDFC Bank ha ka Jylla Meghalaya, ki nongpynïaid ka HDFC Bank, ki Myntri Shnong bad kiwei de.
Kane ka jaka pynlang pisa ba thymmai ka don harud bah hajan ka ophis jong u PWD (Roads) bad mar syndah bad ka Rani Motor, South West Khasi Hills District ka long ka branch ba 21 jong ka HDFC Bank hapoh ka Jylla Meghalaya. Da ka jingplie ïa kane ka HDFC Bank Mawkyrwat Branch kan sa long ka jingmyntoi na ka bynta ki paidbah jong ka dong ka thaiñ baroh kawei da kaba kin wan ha kane ka jaka ban thep ïa ki pisa jong ki.
Haba kren kum u kongsan ha kane ka sngi, u bah Renikton Lyngdoh Tongkhar, PHE Minister u la ïathuh ba ka PHE ka don ka jingïadei ba khlaiñ bha bad ka HDFC Bank u la pyntip ruh ba ka Sorkar India ka la mang pisa sa kumba T. 400/- Crore (Sawspah Klur) na ka bynta ban pynïaid ïa ki kam ka Jal Jeevan Mission hapoh ka Jylla Meghalaya. U la bynrap ba ka jingdon katei ka Bank kan sa ïarap shibun ïa ki kontraktor jong ka dong ka thaiñ ban pynïaid ïa ki skhim lyngba ka JJM bad kumjuh ruh ïa u paidbah.
U la ai ruh ka jingïaroh na ka bynta ki bor ba ha khlieh jong kane ka HDFC Bank Limited kaba la wanrah ïa kane ka ophis treikam ba thymmai hangne ha Mawkyrwat ka ban sa long ka jingmyntoi na ka bynta u ba bun balang. U la kyntu ruh ba ka HDFC Bank wat lada ka long ka private bank kam dei ban shu hun tang ha ka kam business hynrei ban wanrah ruh ïa ka roi ka par bad ban leh ki kam shakri ïa ka dong ka thaiñ.
U bah Renikton u la pyntip ruh ka sorkar Jylla ka la lah ban pynbeit ïa 6 tylli ki bynta jong ki khappud hapdeng ka Assam bad Meghalaya da ka jingïasoi soskular hapdeng ka Assam bad Meghalaya hakhmat u Amit Shah badei peit ïa ki kam pohïing ka Sorkar India.
U la pynkut da kaba ong ba ka jingdon ka HDFC bank ha Mawkyrwat kan sa ïarap shibun ïa ki briew ba kin ym jynjar than ban pyndep ïa ki kam ha kaba ïadei bad ka bank.
Ka Kong Caramai Khakongor, IAS, Deputy Commissioner, SWKHD, Mawkyrwat kaba long ka symbud kongsan ha katei ka sngi ka la ong ba ka jingdon ka HDFC Bank ka long ka jingkyrkhu ïa u paidbah ka dong ka thaiñ. Ka kyntu ba ka HDFC Bank ka dei ban long kawei na ki bank ban ïarap ïa ki paidbah nongshong shnong ka dong ka thaiñ da kaba ai ïa ki ram ha ki nong thaiñ jingthaiñ bad ha ki nongrep khnang ba kin kiew ïa ka ïoh ka kot bad kan kyntiew ïa ka imlang sahlang.
Ka la ong ruh ai ba ki briew kin sngew ïa ka bank kum ki paralok ha ka jingïadei bad ki kam ki jam jongki. Ka DC ka la ban ruh ba ki nongtrei ka HDFC bank ki dei ban pynïadei bad sngewthuh ïa ki jingeh jong ki briew ka distrik khnang ba kin ïoh ïa ka jingshaniah ha kaba ïa dei bad ki kam jong ki.
Ha katei ka prokram la ïoh ruh ka jingkren na u bah W.L. Snaitang, Secretary Dorbar Shnong Mawkyrwat. Ka la don ruh ka jingpynithuh ïa ki nongtrei ba nyngkong eh jong ka HDFC Bank ha Mawkyrwat ba kynthup ïa u Kamalesh Paul kum u Branch Manager, bah Leon Sutnga kum u Authorizer BM (Back-up), bah Diones Wartde, P.B Sales bad u bah Bankhraw Mawlong kum u Teller.
La pynïaid ïa katei ka prokram da u Gopal Purkayastha, Branch Manager, Laitumkhrah Branch, la kren ai pdiang sngewbha da u Roshan Thapa, Cluster Head jong ka HDFC Bank ha ka Jylla Meghalaya.
