Nongstoiñ, Lber 30: Ïa ka District Level Industrial Exhibition kaba ar sngi la plie da u bah E Lyngdoh MCS Extra Assistant Commissioner (EAC) West Khasi Hill District ha ka sngi hat majai jong ka taiew ha New Nongstoiñ Playground bad ïa kane ka prokram la pynlong da ka ophis jong ka District Commerce & Industries Centre, Nongstoiñ.
Haba ai jingkren ha kane ka sngi plie u bah E Lyngdoh u la ai ka jingïaroh ïa ka Department, kaba la lah ban pynlong ïa kane ka exhibition kaba long ka rynsan ban pyni ïa ki sap ki phong sha ki nongshong shnong bad ka lad ka lynti ban pyni lang ïa ki nongïashim bynta.
U la ong ba kane ka exhibition kan khring ïa ki samla ka thaiñ ban wan shakhmat ban ieng ha la ki jong ki kjat ban seng kam la jong khnang ban rat dyngkhong ïa ka duh kam duh jam. U la kyntu ïa baroh ban shim ïa ki lad ki lynti kiba thymmai katkum kane ka juk kaba mynta kum ka internet bad ka e-commerce, khnang ban lah ban pynïaid iew bha ïa ki mar ki mata kiba ki shna sha ki iew ki hat.
U la ban jur ïa ki nongïashim bynta ba kin trei shitom bad minot thop khnang ban pynjanai shuh shuh ïa ki kam ba ki leh ban kyntiew ïa ka ïoh ka kot ha ka District bad ka Ri hi baroh kawei ula pynkut. Na ka liang u kongsan u la pynlong ruh ïa ka jingjurip ïa ki stall bapher bapher kum ka tailoring, Juice maker, handicraft, stone carving bad kiwei kiwei ki stall.
Kiwei kiba la ai jingkren ki long bah IZ Wreang GM, DC&IC u ba pynïaid ïa ka jingïalang, bah NF War FM, DC&IC uba la ai ïa ka jingkren pdiang, bah BF Sun FM, DCIC, bah L Niang DAO bad kong ABA L Mawlong Project Manager DC&IC ba la ai ïa ka jingkren khublei.
Kane ka prokram ka la kut noh hynne ka sngi balang, hynrei la sakhi pat ïa ka jingkynjah slam slam bad ym ïohi ba ki paidbah kin tuid sha kane ka iew. Ka lah ban long imat ka jingbym nang ban ai jingtip paidbah kaba khambha na ka liang ka tnad, lane ka dei namar ka jingkyrduh bylla ki paidbah. Hynrei, na ka liang ki ophisar sorkar kiba dei peit ki la leh ïa la ka bynta ban pynshai, ai mynsiem bad pynshlur ha kaba ïadei bad ka jingseng kam lajong.
