Shillong, Nailur 11 : U Chairman ka Central Scheme Monitoring Committee (CSMC) jongka BJP u bah A.L Hek uba dei ruh u MLA na ka Pynthorumkhrah Constituency mynta ka Sngi U Blei u la dawa na u Myntri Rangbahduh ka ri u Narendra Modi ban phah tohkit halor ka jingai kontrak ban tei ïa ka Assembly ha Mawdiang Diang namar kam long kaba khuid bad suba.
Ha ka shithi ba u la phah da u Myntri Rangbahduh u bah Hek u la pynpaw ba ka jingïatrei lang hapdeng ka Niman Nigam Limited na Utter Pradesh bad ka Badri Rai Company Ltd ka la wanrah ka jingduh nong kaba khraw ïa ka jylla khamtam na ka jingkhyllem jongu Dome.
“Ka jingtei ïa ka Assembly da kine ki komapani ka la wanrah ka jingduhnong kaba khraw ïa ka jylla kumta nga kyrpad ba phin phah da ka jingtohkit ban lap ïa ka daw jong ka jingbym treihok” ong u bah Hek ha ka shithi.
U la ong shuh shuh “ Ka kaiphod jong ka Indian Institute of Technology, Guwahati (IITG) ka kdew shai kdar ba ka jingtwa jong u Dome ha ka 22 tarik Jymmang 2022 ka dei ka jingkhia palat pud namar u khia haduh 4.5 lak kilo. Nalor kata kam don ka jingïatrei lang hapdeng ki Kontraktor, ki Engineer, Designer bad Project Management Consultant (PMC). Kumta kane ka jingtwa jong u Dome ka la wanrah ym tang ka jingduh nong kaba khraw hynrei ka la buh ruh ïa ka jylla ha ka jinglehraiñ kaba khraw”.
Nalor kata u la ong ka rukom ai ïa ka kam ruh ka long ka bym shai namar ha kaba nyngkong ïa ka Badri Rai Company la kyntait namar kane ka kompani kam biang ki kot ki sla bad kam dei kaba la paw nam ban tei kino kino ki jingtei khamtam ïa u Dome, kam don ki Bank Solvency Certificate/ Overdraft Facilities/ Credit Limit na kano kano ka Nationalized Bank la kumno kumno ruh 20 % na ka jingmang ban tei ïa ka projek. Kumta hadien kane la ai sha ka Rajkiya Nirman Nigam Limited kaba na Utter Pradesh kane ka la ai sub contract pynban sha kane ka Badri Rai Company Ltd kaba dei ka kompani kaba la shah kyntait ha kaba sdang.
