Shillong, Nailur 10 : Ka Khasi Hills Autonomous District Council (KHADC) kan ïa kynduh lashai ka Lah Sngi U Blei na ka bynta ban shim rai ban dawa ba ka sorkar ka dei beit ban pynkylla ïa ka Notification ne ka jingpynbna ba ka la pynmih da kaba pynpaw shai ïa ka kyntien ba ka CrPC bad CPC kan ym treikam ha ki ïing bishar District Council khnang ban ïashai bad ban ym don kano kano ka jingsngewthuh bakla ne pyndonkam bakla ïa kane ka notification lashai la shisngi.
Haba kren bad ki nongthoh khubor ha ka Sngi Saitjain u Chief Executive Member (CEM) ka KHADC u bah Titosstarwell Chyne u la ong ba ki District Council ki khuslai namar ha ka notification la kren shai ba ka kyndon aiñ CrPC bad CPC kin treikam ha baroh ki ïing bishar ha ka jylla.
Hooid na ka liang u Myntri Rangbah u Conrad K Sangma ula pynshai ba kane kan notification halor ka CrPC bad CPC kan ym lah ban long halor ka bor bad iktiar ba la pynkupbor da ka Riti Synshar ka ri ïa ki District Council kat kum ka Sixth Schedule namar ki ïing bishar jong ki District Council kin treikam beit kumba ju long baroh shi katta.U la ong ruh shu buh lada jia ba ka don ka jingmushlia ïa ka bor bad iktiar ki District Council ki lah ban leit sha ka ïing bishar ba kham halor ban pan jingpynshai kaei kaba ka Para 4 bad 5 jongka Sixth Schedule ka la dep kren shai halor ka bor ki District Council.
Halor kane u CEM u la ong “ Kaei kaba u Myntri Rangbah u ong lada don kiba mushlia bad ïalam bakla ïa ka notification khlem pep ka ïing bishar kan ai rai hi ban pynksan ïa ki district council namar la pynkup bor ïa ki da ka Riti Synshar ka ri. Hynrei kane ka jingkular jongu kam pat biang namar ngi kwah beit da ka jignthoh ban ym mih kino kino ki kynrum kynram hadien habud. Na kata ka daw ngi dawa na ka sorkar ban pynbeit ïa ka notification khnang ban ym don ki jingkulmar hadien habud”.
Ka KHADC ka kwah ban tynsat ïa ki kyntien “ Lait noh ki ïing bishar kiba hap ha ka Sixth Schedule”.
