Ka NIT ha Sohra: Balei wat hadien 8 snem ruh ym pat lah ban pyndep?

Shillong, Nailur, 11: Ka jingpyntrei ïa ka National Institute of Technology (NIT) ka don mynta ha ka jingkyrmen ba kan dep noh ha shwa u Lber 2023, pyntip ka company ba pyntrei ïa katei ka jaka pule kaba heh bha kaba don ha Sohra ha ka jingleit jurip ka FKJGP Seng Kmie ha kane ka sngi Saitjain.
“Ka jubab ba ngi ïoh da ka jingthoh na ka RITES kaba pyntrei ïa kane ka projek ki ong ba ïa ki academic building, ki adminstrative building bad ruh ïa ki workshop bad hostel kin sa pyndep noh bad ban aiti noh ha u Lber 2023 sha ka NIT,” ong u President ka FKJGP Sengkmie Bah Dundee Cliff Khongsit haba kren bad ki lad pathai khubor hadien ka jingjurip bad ka jingïalang kaba lyngkot bad ki heh ka company.
Utei u nongïalam ka FKJGP u ong ruh ba jingwan jong ka seng ha katei ka sngi ka long ban tip ïa ka daw tynrai kaba katei ka permanent campus jong ka NIT ba pawnam ka slem ban dep watla ka kam ka la sdang naduh u Nailur 2014. Halor kane, u ong ruh ba ka seng kan pyntikna ba kan ym kut tang ha ka jingwan jurip hynrei kin buddien ruh ban kyntu ïa ka sorkar jylla bad ruh ïa ka sorkar pdeng ba kan kham pynstet ïa ka jingpyntrei namar katba nang dep kloi ka jingïohnong kan dei ïa ka jylla.
La ïathuh ba na ka Consultancy ki pyntip ba ki daw kiba pynlong ïa katei ka projek kadei eh naduh ka jingslem jong ka sorkar pdeng ban pyllait pisa ha u snem 2017, nangta ka jingwan noh ka khlam COVID bad ruh halor ka jingeh ban pynpoi ïa ki tiar na shabar kynthup naduh shabar ri ruh kumjuh.
“Shen ngin sa rah ruh ïa kane ka ishu sha ka sorkar jylla bad ruh sha ka sorkar pdeng lyngba ki MP jongngi,” u la bynrap biang.
Haba kren pat halor ka jingpynrung ïa ki samla ha katei ka jaka pule, u Bah Dundee u la ong ba ki tip ba ka jingpynrung kan dei beit da ka jingtbit jong ki samla. Kumta kane ruh kan dei ka kabu siar ïa ki samla Khasi kiba mynta ki la don bun kiba stad bad ki proh bad kiba la pynkhreh ruh ban ïakhun watla kadei da ka jingtbit ruh.
“Tangba ngin sa ïa kren ruh wat haba ïadei bad ka bhah kyrpang. Hynrei ym dei pat ban ong ba tangba katei ka jaka pule ba pawnam ka don ha Meghalaya yn shu shaniah beit ha ka bhah kyrpang ban ïoh rung.”
Ha ryngkat ka jingdonlang ki nongïalam ka seng na Sohra, u Bah Dundee u la pynpaw ruh ba ynda la dep katei ka NIT Meghalaya ha Sohra, kan long ka jingkyrkhu kaba khraw ïa ki samla ka jylla namar kin don da ki spah spah ngut ki samla kiban ym donkam shuh ban leit pule shabar jylla.
Ha kawei pat ka liang u la ong ba ka seng kan peit ruh ba na ka bynta ki kam ki jam kiba lait hangtei, dei ban ailad ïa ki samla na katei ka thain Sohra shwa katkum ka jinglah jong ki ym ban shu wanrah lut na shabar.