Nongstoiñ, Lber 30: Na ka bynta ban pynsngewthuh ïa ki nongshong shnong kumno ban ïarap ïa kiba mynsaw ha ki jingjia bym poi pyrkhat kum haba pluh ki ïing ki sem, ka jinglynshop ki bor ka mariang, ki jingaksiden bad kiwei kiwei, ka District Disaster Management Authority, ha ka sngi balang ka la pynlong ïa ka Mock Drill ha Petrol pump Upper New Nongstoiñ ha kaba la ïashim bynta lang da ki nongshong shnong, ki nongtrei jong katei ka petrol pump, ka tnad pulit pynlip ding, ki nongtrei ka tnad ka koit ka khiah ryngkat ki Doctor.
Kiba la wan ban ai jinghikai ha katei ka sngi ki dei ki shipai jong ka tnad CRF bad NDRF kiba na Guwahati. Ki jinghikai ba kongsan ha katei ka sngi ki long kumno ban pyntip sha ki bor ba dei peit bad ban ai jingïarap ha kaba pynlip ïa ka ding ba klang bad ban ai jingïarap kiba malu mala haduh ban da pynpoi ïa kiba mynsaw sha ki jaka sumar bad kiwei kiwei ki lad jingïarap kiba kyrkieh ïa ki lanot kiba ngat ha kum kitei ki jingjïa.
U bah P.D.Sangma Deputy Commissioner Chairman jong ka Dsitrict Management Authority West Khasi Hills, u la ong ba ka jingpynlong ïa katei ka Mock Drill ka long kum ka jingpynsngewthuh ïa ki nongshong shnong, kumno ban ïatreilang bad ki kynhun kiba la dep pyntbit ha katei ka bynta bad ruh ba ki nongshong shnong kin nang ban khreh lypa ïa ki tiar ki tar ban sumar lada jia kino kino ki jingjia bym poi pyrkhat.
