Shillong, Nailur, 11: Ka Thma Rangli Juki (TUR) ka la pynrem jur ïa ka jingbom ïap ki paidbhur ïa ka ki saw ngut ba kynthup ïa u I Love You Talang, u Lodestar Tang, u Marsanki Tariang bad u Shidorki Dkhar kiba la ba kynnoh ba ki donkti ban pynïap ïa u nongniah kali kamai Tourist Taxi u Bah Damehipaya Papeng bad u Fullmon Kharsahnoh.
“Ka TUR ka pynrem jur ïa ki briew kiba shim ïa ka aiñ ha ka kti lajong la ki dei na ka liang ki bor Sorkar bad bym dei Sorkar. Ka pynïap klep bad bom shnong ka long be-aiñ. Ka aiñ bad ki kyndon aiñ ki dei ban treikam ïa baroh lym kumta ka kynrum kynram ba shyrkhei kan jia hapoh ka Jylla” ong ka kyrwoh na ka Kong Angea Rangad.
Ka TUR ka la ong ruh ba kaei kaba jia ïa u Bah Chersiterfield Thangkhiew ha u snem 2021 ha kaba ki pulit ki la hiar ban khynra ïa ka iing jong u bad siat ïap ka dei ka jingïuhroit ïa ka hok longbriew manbriew.
“Ka TUR ka ieng halor bad kyrshan ïa ki nongrim jong ka Ain bad ki hok longbriew manbriew jong iwei pa iwei i nongshong shnong bad ngi pynrem jur ïa ka jingpynïap klep jong ki bor synshar ïa u bah Cheristerfield Thangkhiew. Ka jingpyrshang jong ka Sorkar Jylla ban buhrieh bad pynjah rngai ïa ki kam be-aiñ jong ka tnat pulit da ka jingtohkit kaba thamula ka long kaba ym lah ban pdiang satia” ong ka kyrwoh.
Haba ïadei bad ka ka kaiphot tohkit ka TUR ka ong ba kam namar ka jingtohkkit kam nud ban tih bniah ne ban jubab ïa ka jingkylli la ka jingpynïap ïa u bah Cheristerfield ka dei ka jingpynïap klep kaba la thmu lypa.
“Na ka por sha ka por ki Sorkar bapher ki pyrshang ban pynksan ïa ki kam be ain kum kine bad ki ïaleh ban ïada ïa ki riew leh be ain. Bad kane ka buh ïa ka jingim jong ki nongshong shnong ha ki jingma bakhraw. Lada ki bor ba bat bad pyntreikam ïa ki Ain ki leh be Ain, ki pynïap klep ïa ki briew, ngim phylla ba ki paidbhur ruh kin nud ban bom shnong ïa ki koidi kiba phet tuh na phatok kaba ha Jowai, West Jaintia Hills” ong shuh shuh ka kyrwoh na ka Kong Angela.
