Shillong, Nailur 11 : Ka Mawlai SC kaba la ïoh rah nam lahduh ha ka lympung ïalehkai OC Blue Shillong Premier League (ISL) 2021-22 ka la bteng ban khur nam jop da kaba pynliem ïa ka Ryntih SC da 2-1 kol ha ka jingïalehkai ha ka sngi Saitjaiñ ha madan Third Ground, Polo, Shillong.
Ka Mawlai SC ka la long ka lahduh jong katei ka lympung hadien ba ka Langsning FC bad ka Rangdajied FC ki la ïakhaid ha ka jingïalehkai kaba la long ha ka sngi Palei.
Haba phai sha ka jingïalehkai hapdeng ka Mawlai bad Ryntih kaba dei ruh ka jingïakhun Derby, ka Ryntih tang ha ka jingïalehkai ba dang ïaid 4 minit ka la ïoh ban pynkhih jar ba la thep lyngba u Ebormi Buam. Da katei ka jingthep kol ka Ryntih ka jingïakhun ka la thnem bha ha baroh arliang ha kaba ka Mawlai SC ka la ñion naphang sha ka kut jong ka Ryntih ban ïoh pynphai kol.
Ka Mawlai SC ka la ïoh katto katne ki kabu ban pynïakhaid hynrei kam shym la lah ban pyndep ha ka liang ka thep kol hynrei dei tad haduh ka jingïalehkai ba la ïaid 32 minit u Brolington Warlarpih u la ïoh ban thep ïa ka kol pynïakhaid kaba la wan lyngba ka jingshut penalty.
Da katei ka jingïoh thep ïa ka kol pynïakhaid, ka jingïalehkai ka la nang itynnad ha kaba baroh arliang ki la ïakhun tyngeh ban ïoh thep ïa ka kol pyntam hynrei haduh ba kut ka kylla step baroh ar ki kynhun ki la leit sha ki kamra khreh da kaba thep mar 1-1 kol.
Haba wanphai sha ka jingïalehkai jong ka kylla miet, ka jingïalehkai ka long ba mar ïakhaid la ka long ha ka liang ka pashat bad pynshat bol. Ka Mawlai SC kaba kham ïoh bat bol ka la ñion sha ka kut bad dei ha ka minit ba 75 u Robert Khongriah u la thep ïa ka kol pyntam na bynta ka Mawlai SC ha kaba ka kynhun ka la pynliem syndon da 2-1 kol.
Lyngba katei ka jingjop ka Mawlai ka la kamai 32 poiñ na ki 12 sien ïalehkai bad sah sa arsien katba ka Ryntih SC ka kamai 17 poiñ bad don ha ka kyrdan ba saw. Ka jingïalehkai jong ka CO Blue SPL kan long biang ha ka 14 tarik Nailur hapdeng ka Nangkiew Irat SC (16 point) pyrshah ïa ka Malki SC (7). Ha ka jingïakhun ba lah dep ka Nangkiew Irat ka la pynliem ïa ka Malki SC da 3-1.
