Mawkyrwat, Nailur 11 : Ka New Mawjai Sports Club hynnin ka sngi ka saitjaiñ ha ka lympung ïalehkai kynjatbol ba la pynïaid da ka Nongriem-Mawpat Sports Club ka la long ka kynhun kaba la rah ïa nam jop hadien ba ka la pynliem noh da 4 – 0 kol pyrshah ïa ka Umsaw Sports Club ha madan Nongriem-Mawpat, South West Khasi Hills District.
Haba phai ha ka jingïalehkai, ka la long ka jingïalehkai kaba itynnad bha naduh kaba sdang haduh kaba kut namar ka jingïakhun jong ki ka long ban rah ïa ka nam jingjop. Hapdeng ka jingïalehkai la sakhi ba ka New Mawjai Sports Club ka la pynliem noh da 4 – 0 kol pyrshah ïa ka Umsaw Sports Club.
U samla Gilbert Thyrniang uwei na ki samla rangba na Shnong Rangblang Sohsyniang kum u kongsan haba kren ha ka jingïalang ba lyngkot u la ai mynsiem na ka bynta ki ‘rangïalehkai ba kin long ki samla kiba pyndonkam hok ïa ka sap ka phong ba ki ki don bad ym ban shu pynleh noh ei kai ha ki kam ki bym lar kam kum ha kaba pynlut por ha ka bam ka dih kiba pynsniew ïa ka met ka phad kum ka kyiad bad u drok.
U la ong ruh ba ka kam ïalehkai ha kine ki sngi ka la long kawei na ki kam kaba lah ban pynim ja kpoh ïa ki briew. Namarkata, kum ki samla haba ki sngewthuh ba ki don ka sap ha kane ka kam ïalehkai ki dei ban pynkham bun ïa ka por ryngkat ruh ka jingpynleit jingmut ha ki jingpule.
Ha kaba kut jong ka jingïalehkai na ka liang ki nongpynïaid ki la ïoh ruh ban sam ïa ki khusnam sha baroh ar tylli ki kynhun. U Symbud kongsan ha kane ka sngi u dei u bah Shemphang Kharbani na Shnong Myriem ha kaba ïa ka jingïalang la pynïaid da u bah Basil Paliar.
