Jowai, Lber 30: Ka lympung ïalehkai phutbol ba la pynïaid da ka West Jaiñtia District Sports Association (WJDSA) kaba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la long mynta ka sngi ha madan Kiang Nangbha Stadium Jowai.
Ha ka jingïakhun ba nyngkong ka kynhun jong ka Khliehmyntdu Neiñchnong kala lah ban pynliem ïa ka Ksehsylle Ialong da 1-0 kol, ïa katei ka shi kol na ka Khliehmyntdu la theh da u rangïalehkai jong ka u Lephiwanmi Kyndait ha ka minit kaba 56.
Ka jingïakhun ba bud kaba la long hapdeng ka Lumchyrmang Mihmyntdu pyrshah ïa ka Saiñdur Mihmyntdu, na ka liang ka kynhun Lumchyrmang Mihmyntdu kala jop da 2-1 kol, ïa kitei ki ar kol na ka Lumchyrmang la thep da u Emdor Chyrmang ha ka minit ba 37 bad 44. Katba ïa ka shikol na ka Siañdur la thep da u Dapmon Phawa ha ka minit ba 14.
Ha ka jingïakhun kaba lai kaba la long hapdeng ka Moodymmai pyrshah ïa ka Iong I dahi FC kala kham thep shiliang ha kaba ka Iong-I kala jop da 4-0 kol ïa ka Moodymmai. ïa kitei ki saw kol na ka kynhun Iong-I la thep da Kirot Phawa ha ka minit ba 2, u Pynaimi Phawa ha ka minit ba 25 bad u Ioolangki Sana ula thep ar kol ha ka minin ba 36 bad 57.
Ka jingïakhun lashai ka sngi 31 tarik kan long hapdeng ka Royal Pole Mihmyntdu pyrshah ïa ka Pasyih Cultural and Sports Club ha ka por 11 baje mynstep, ka Mukhla Umlangshor pyrshah ïa ka Mookyrdup ha ka por 1 baje nohphai sngi bad ka Mookynphad Mihmyntdu pyrshah ïa ka Lumbhahdakha Wahiajer haka por 3 baje janmiet.
