Ha ryngkat ka pyrthei kynmaw burom ki khynnah skul ha West Jaiñtia ïa ka ‘World Literacy Day’

Jowai, Nailur 09: Ki khynnah skul hapoh ka West Jaiñtia Hills ha kane ka 8 tarik u Nailur kaba dei ruh ka sngi kyrpang jong ka thoh ka pule puthi bala tip kum ka ‘World Literacy Day’ ha kaba ka thong jong ka UNESCO la buh ïa kane ka sngi ka long ban ïawer lang ïa ki paidbah nongshnong shnong ba don ha ki ri ka pyrthei ba kin shim ka jingkikhlieh lang ha ka ban kyntiew ïa ka pule puthi bad rat diengkhong ïa ka jingsahdum sahbiej ha manla ki shnong ki thaw.
Kumta ruh ki skul ha West Jaiñtia Hills District da ka jingsngewkhia ïa kane ka sngi ki la shim ban pynlong ki prokram bapher ïa ki khynnah skul kiba long shibynta ban pynkynmaw ïa ka jinglong kyrpang jong kane ka sngi kumba la dep pruid dak da ka UNESCO naduh u snem 1966.
Ki jait prokram ba la pynlong ha kane ka sngi na ka bynta ki khynnah haman ki skul ki long ka Drawing-Painting, Poetry writing, Slogan writing bad ka Recitation kiba ïadei bad ka World Literacy.
Ka kong Tina Lakiang, Secretary SMC R.C. Eve Secondary School Mihmyntdu haba kren ha ka jingïalang ba la pynlong ha kane ka skul, ka la ïathuhha ibor barit kane ka skul kum kawei na ki shlem ai jinghikai ba peit kyrpang ïa kito ki khynnah bawan na ki longïing longsem ba ban ka jingduk jingkyrduh bad kito ki bym ju leit skul ne pep skul shiteng por ki la ïaleh katba lah la i bor ban khring ïa ki khynnah ba kin wan ha kane ka Skul na ka bynta ba ki ïoh ïa ka jingnang jingstad bad ruh kin lait na ka jingim lyngkar.
Shuh shuh ka da sngew sarong ruh ban ïathuhba kumba long haduh mynta ki don shibun ki khynnah kiba wan ban pule ha kane ka skul bad ka jingdon ki khynnah ne ki briew banang ban thoh bad pule hapoh ka shnong Mihmyntdu ki la bun bad kane ka pyniruh ba ka literacy rate jong ki nongshnong shnong ka la nangkiew haba ïanujor bad ki por bala leit.
Na ka liang ki nonghikai ha ka thong jong kane ka sngi haman ki skul ki la shim bynta ruh ba ai ki jingkren jingbatai shaphang ka jingkordor jong ka jingnang jingstad bad ruh ki kyntien ai mynsien ïa ki khynnah da kaba pynshong nongrim halor ka mat pdeng jong kane ka sngi ba ong “Transforming Literacy-Learning Spaces”.