Watla ki jinghikai ha kaba ïa dei bad ka khuid ka suba ka ju ïai sawa na kawei ka snem sha kawei hynrei ka jingpynjakhlia ne bret pathar ïa ki jakhlia ka la nang jyllei, ha kaba ïa kane ka jingbret pathar ïa ki jakhlia la ïohi ha bun ki bynta ka nongbah Shillong.
Ynnai ïa kren ha ki bynta Ïew ba ïaid bha ki paidbah pynban ka jingbret jakhlia pathar ka ka long sa ha ki nala shnong bad ki briew kim salia than tangba lait na ïing lajong bad ki dukan ba ki shong kamai ja kpoh ha ki rud surok bad lynti ïaid kjat.
Bun ki sngewthuh halor kane ka phang kumno ban lehkhuid hynrei ïa kata hi ki ïaleh pyrshah. Bun ki sngewthuh ïa ka jingkordor jong ka khuid ka suba hynrei kim suidñiew satai ïa kata bad kane ka long pyrshah ïa ka jingkwah jong ki bor shnong bor thaw ne wat ki bor district ruh.
Ka jingbret jakhlia pathar ha kum kitei ki jaka ka la long ka jing-i-saitmet haduh katta katta. Ki nongshong shnong ki dei ban pyrkhat ruh ïa ka lawei ka ban sa wan ba ïoh kan poi ka por ba ki shnong kiba don harum jong kitei ki jaka kin bam lang ruh ïa ki jakhlia lyngba ki dohum dohwah bad wat haba ki ïaid ki ïeng ki hap ban ïuh na jrong jong ki jakhlia.
La lap bunsien ba ki briew ki song ïa ki jakhlia na ïing bad bret pathar pat sha ki rud surok bad ki lah ban dei na ki nongwan ïew ne na ki ïing briew namar ki don ki kynja plastik, ki juti jot bad kiwei. Ki briew kim ju salia ban pynjakhlia ïa ki jaka jngohkai pyrthei da kaba pynpait ïa ki bilor kyiad.
Shwa ban poi ka jingeh ne ki jingma kiba ap ha khmat, ki paidbah nongshong shnong ki dei ban pyrkhat thymmai, watla ki jaka bret ñiut kiba paka hapoh jong ka nongbah kim pat biang bha hynrei ïaleh ban lum ha ki jaka la jong la jong bad bret ïa ki ha ka rukom kaba dei.
Ka jingkyrpad ka long ba ïa ki jakhlia khamtam eh ki kynja plastik bad bilor to ngin ïa long adkar ban nym bret pathar namar kine ki buh jingma na ka bynta ka lawei ban wan bad haba leit bret jakhlia ha ki jaka bym ïohi ki briew, ki nongbret ruh ki dei ban pyrkhat ar sien ïoh lehse ha kawei ka por ki phyllaw jong ki kin shah bret jaboh kylla.
Bun sien ki ingmaham kiba tyngeh la pynjari da ki bor shnong ba ym dei ban bret jakhlia hynrei hangto ha khmat signboard jingmaham hangto hi ki nongshong shnong kin bret jakhlia khlem salia ha ki por miet ne bym ïohi briew.
Ka Sorkar Jylla ka dei ban pyntreikam pyrkhing ïa ki kyndon ha kaba ïa dei bad ka jingteh lakam ïa ka jingbret jakhlia sha ki wah ne nala ka nongbah Shillong. Ngi la ïohi ïa ka long ka man jong ka Wah Umshyrpi bad Wah Umkhrah kiba la i salïa wat tang ban iuh kjat ruh.
Kumta ruh ha kaba ïa dei bad ka jingwan bret pathar jong ki briew ruh dei ban don ki kyndon ba lada lap kin sa shah kem bad shah daiñ kuna. Kaba kongsan eh ka dei ka jingmut jingpyrkhat jong ki nongshong shnong hi nan wanrah ka khuid ka suba ha kylleng ka nongbah Shillong.