Pynliem ka kynhun ki Pulit Ri Bhoi ïa ki Nongthoh Khubor na Ri Bhoi ha ka jingïalehkai phutbol paralok

Nongpoh, Nailur 09 : Ha ka jingïalehaki phutbol paralok mynta ka sngi ha Madan NSCA Mini Stadium, Pahamsyiem hapdeng ka kynhun ïalehkai Ki pulit Ri Bhoi bad ka ophis u DC, ki Nongthoh Khubor na Ri Bhoi ki la hap ban mad ïa ka nam rem hadien ba ki la shah pynbam da 3-0 ha katei ka kynhun ki Pulit bad ka ophis u DC na Ri Bhoi.
Kum ban pynkynmaw, kane ka jingpynlong ka ophis u Deputy Commissioner ka Ri Bhoi bad ka ophis u Superintendent of Police na Ri Bhoi ïa kane ka jingïakhun phubol paralok, ka dei shi bynta ban don lang kata ka mynsiem jong ka jingïatrei lang na kabynta ban rad dyngkhong na ka jingktah u drok bad kiwei kiwei ki kam sniew kiba kum ka imlang ka sahlang ka donkam ban don ka jingïatrei lang.
La sakhi lang ruh ha kane ka jingïakhun phubol paralok ka kynhun ka bor synshar ka District da ka jingdon lang u Superintendent of Police ka Ri Bhoi, u Giri Prasad, u Additional Deputy Commissioner ka Ri Bhoi, u bah M.B Tongper bad kiwei kiwei ki ophisar na Ri Bhoi bad ki kynhun nongthoh khubor na Ri Bhoi.
Haba phai sha ka jingïakhun hapdeng ka kynhun ki pulit bad ka ophis u Deputy Commissioner pyrshah ïa ki nongthoh khubor, ha ka kylla step ka jingïakhun ka la kut khlem da don ba lah ban thep kol, hynrei dei ha ka kylla miet da ka jingkham trei shitom ka kynhun ki pulit ki la lah ban khur noh ïa ka nam jop da kaba pynrem noh ïa ka kynhun ki nongthoh khubor da 3-0.
Nalor kane ka jingïakhun paralok, ba la jop ka kynhun ki pulit pyrshah ïa ki nongthoh khubor, la pynlong ruh ïa ka jingïashut tie breaker bad ha kane ka jingïashut tie breaker pat ka kynhun ki nongthoh khubor ki la pynrem noh ïa ka kynhun ki pulit da 4-2 kol.