Yn ïalehkai phutbol paralok ka ophis u DC bad SP bad ki Nongthoh Khubor na Ri Bhoi

Nongpoh, Nailur 08: Kum kawei na ka thong ban don ka jingïatrei lang na ka bynta ban pyn duhjaid ïa ki jaid jingsniew bapher bapher hapoh ka imlang ka sahlang khamtam ki jingdih buaid kum u drok, ka ophis u Deputy Commissioner bad ka ophis u Superintendent of Police, Ri Bhoi kin pynlong da ka jingïalehkai phutbol paralok hapdeng ka kynhun ïalehkai na ka ophis u Deputy Commissioner bad Superintendent of Police pyrshah ïa ki nongthoh khubor na Ri Bhoi District.
Kane ka jingïalehkai phutbol paralok hapdeng ka bor synshar District bad ki nongthoh khubor na Ri Bhoi kan long ha ka 9 tarik u Nailur, 2022 ha ka por 3 baje janmiet ha Madan NSCA Mini Stadium, Pahamsyiem, Nongpoh.
Haba kren bad ki lad pathai khubor, u Deputy Commissioner ka Ri Bhoi, u Arpit Upadhyay a bad u Superintendent of Police ka Ri Bhoi, u Giri Prasad, ki la ong ba ka khubor kaba ki kwah ban pynlong ïa kane ka jingïalehkai phubol paralok bad ki Nongthoh Khubor ka long ba ai jinghikai sha ki paidbah na ka bynta ban ïa khun pyrshah ïa ki kam sniew kiba don ha ka imlang ka sahlang.
Kitei ki heh ophisar ka Ri Bhoi ki la ïathuh ruh ki mat ba hakhmat eh ba kum ka bor synshar district ki kwah ban don ka jingïatrei lang ka long ban rad diengkhong ïa ka jingktah jong u drok, ka kyiad, ka jingthom bor ïa ki kynthei ki khynnah bad kiwei kiwei ki kam sniew kiba ktah ïa ka imlang ka sahlang.
Na ka liang kitei ki heh ophisar ka Ri Bhoi ki la khot la wer ïa ki paidbah ka Ri Bhoi ba kin wan ban sakhi lang ha katei ka sngi bad kumjuh ruh ba kin dang ai ka jingïatrei lang na ka bynta ban ïa khun pyrshah ïa kitei ki kam sniew kiba ktah ïa ki khun samla, ki longïing longsem bad kumjuh ruh ha ka imalang ka sahlang.