Ka jingdon ka dur u ‘Sngap Sing Syiem’, kan pynkynmaw ïa ki kam bad ki matti ka mynnor: MDC

Mawkyrwat, ‘Nailur 08: U MDC ka Mawkyrwat Constituency, bah Carness Sohshang bad kum u President ka Alumni Association jong ka Sngap Syiem College, Mawkyrwat mynta ka sngi u la ïoh ban plie paidbah ïa u mot sah jingkynmaw jong u Sngap Sing Syiem uwei na ki syiem bakhraw jong ka Hima Maharam bad kumjuh ruh ïa ka ‘Ramp’ kaba dei ka lynti ïaid khnang ba ki briew kiba don ka jingduna ha ki dkhot met kin ïoh pyndonkam ban kiew ban hiar ka dei ha ka mang pisa kaba kot T. 4 lak tyngka lyngba ka KHADC.
Haba kren kum u kongsan ha ka jingïalang, u bah Carness u la ong ba ka jingdon ka dur jong u mot jong u Sngap Syiem uba ïeng hakhmat jong ka Sngap Syiem College, Mawkyrwat kan kren bad pyni ïa ka dak ban ngin kynmaw ïa ka jingieit jong u kum u ‘riew khraw ba u kwah ba jaidbynriew jong ngi kan neh ha la ka jong ka nongrim bad kumjuh ruh ban kynmaw ruh ïa ki kam bad matti kiba khraw ba u u la leh.
Ha kaba ïa dei bad une u mot, u bah Carness u la ban shuh shuh ba une u mot ne statue um lah shuh ban kren hynrei une un ïeng ban pynkynmaw ïa ki samla pule bad ki samla jong ka jaidbynriew shaphang kiba bun bah ki kam kiba u Sngap Sing Syiem u la leh ha ki sngi ba mynbarim bad un pynkynmaw ruh ba kum ki paidbah ki dei ban ieit ïa la ka jong ka jaidbynriew, ïa la ka jong ka hima bad ïa la ka jong ka jaka ka puta. U la ïathuh ba u Sngap Sing Syiem ha ka por ba u ïaleh thma, u khlem ïaleh na ka bynta ka myntoi shimet hynrei u ïaleh na ka bynta ka jingmyntoi jong ki briew baroh.
Ha kajuh ka por u la ong ruh ba une u mot jong u Sngap Sing Syiem u pyni ruh ha ngi ba hato kane ka pateng kaba mynta la ngi la long ne em kiba la kloi ban ïeng ïaleh pyrshah lada wan ki bor kiba nabar ne wan ki briew kiba wan knieh jubor ïa ka jinglong trai jong ngi ïa ka khyndew, ka shyiap la jong.
U Dr. K.K. Nongsiej, Principal ka Sngap Syiem College, Mawkyrwat pat u la pynkynmaw ïa ki katto katne ki mat jong ka jingsdang ïa kane ka Sngap Syiem College, Mawkyrwat bad kumjuh ruh ïa ki daw ba la tei ïa une u mot jong u Sngap Sing Syiem. U la pynkynmaw ruh ba ïa u Sngap Sing Syiem la shu antad ba la kha ha ki snem 1770 ei ei bad ïa ka jingkhlad la antad ha ki snem 1848. Ha kaba ïa dei bad ka jingsdang ïa ka kolej, u la pynkynmaw ba la sdang ha ka 11 tarik u Ïaïong, 1985 bad la ai kyrteng ïa ka ‘Sngap Sing Syiem Memorial, Collage’ kum ka dak ban pynsah nam ïa une u syiem bakhraw jong ka Hima Maharam uba la ïeng ïaleh ïa ki phareng ha ki spah snem kiba la leit. Hynrei hadien u snem 1994 ha ka 4 tarik u bnai Jymmang, ka Governing Body ka la pynkylla noh sha ka ‘Sngap Syiem College’.
“Ka jingmut ban kyrteng ‘Sngap Syiem College’ ka long ban kynmaw ïa ki matti bad jingnohsynñiang jong u hapoh jong ka Hima Maharam, ha kaba ka sorkar ruh ka la ñiewkor ïa ki matti jong u, ha kaba ha ka 30 tarik jong u bnai ‘Naiwieng manla u snem la ju rakhe kynmaw ruh ïa kane ka sngi.
Namarkata, halor kane ka kam kaba khraw mynta ka sngi u la pynpaw ka jingaikhublei kaba kyrpang na ka bynta ka Alumni Association kaba la pynurlong ïa kane ka jingthmu naduh ba sdang bad haduh ban da ïoh ban plie paidbah ïa une u mot mynta ka sngi ka 8 tarik ‘Nailur, 2022 bad kumjuh ruh ban plie ïa ka ‘Ramp for Students’ with Disabilities and Different-able’ kaba dei ka lynti ïaid khnang ba ki briew kiba don ka jingduna ha ki dkhot met kin ïoh pyndonkam manla ka sngi.
Ïa kane ka sngi, la sakhi lang naduh ki nonghikai, ki samla pule, ki nongkitkam jong ka Alumni Association ryngkat ki kmie ki kpa ki samla pule jong kane ka Sngap Syiem College, Mawkyrwat. Ïa ka jingïalang la pynïaid da ka Dr. B. Marweiñ, Vice Principal jong ka Sngap Syiem College, Mawkyrwat.