Mawkyrwat, ‘Nailur 08: Ka District Social Welfare Officer, South West Khasi Hills District, kong H. Sahkhar, ka la pynkynmaw ba ka jingtyngkai bad kynshew ïa ka um ka long kaba donkam haduh katta katta la ka long lyngba ka jingshna ïa ki jaka pynlang um kiba biang ne da kiwei de pat ki lad bad ïa kane ka jingkren ka la pynsngew ha ka jingïalang ban pynsngewthuh paidbah halor ka ‘Poshan Vatika’ ha kaba ïa dei bad ka rukom pynlang bad pynneh pynsah ïa ka um bad ka jingsam symbai ba la long ha Mawkyrwat Community Hall.
Ka kong H. Sahkhar, District Social Welfare Officer, South West Khasi Hills District haba kren lamphang halor kane ka prokram, ka ka la ong ba ïa ka Poshan Maah la rakhe naduh u snem 2018 ter ter bad la pyntreikam ïa katei ka skhim ha baroh kawei ka ri kaba ka jingthmu ka long ban rat dyngkhong ne pynduh pyndam ïa ka jingduna bam kaba la ktah ïa ka koit ka khiah jong ki kynthei, ki longkmie bad ki khyllung khynnah da kaba ban jur ba ka jingduna bam ka wanrah ïa ki jingpang ba bun jaid kum ka Anaemia bad kiwei bad ha kajuh ka por ka pynthut ïa ka jingheh jingsan ne ka jingkiew ka rynïeng ha ki khynnah (stunting). Shuh shuh ka la ong ba lyngba kane ka prokram ka ban ai jinghikai ïa ki briew kumno ban rep ban riang ha ki kper jong ki Aganwadi Centers bad kumno ba kin nang ban tyngkai bad kynshew ïa ka um na ka bynta ban ïoh ban pyndonkam pat ha ki por kiba rkhiang.
U bah A. Malang, Assistant Director jong ka District Horticulture, South West Khasi Hills District u la ong ba ka rep ka riang ka dei kawei kaba mynta ki la ñiewsting bad leh klet bad dei lyngba kum kine ki prokram ki ban pynkhih jingmut ban trei shitom na ka bynta ban ïoh ïa u soh uba bha. U la bynrap ruh ba haba rep ki donkam ban da bud thik pa thik bad ban rep kat kum ka juk kaba mynta da kaba pyndonkam ïa ki symbai kiba bha bad ban thung ban tep ne ban bet kat kum ka por ka aïom. Nangta, u la ong ruh ba kum ki briew ki jingthung ruh ki donkam ïa ki sawai bad ki jingbam kum ki ‘vitamins’ na ka bynta ban long ban man bad ban heh ban san bad namar ba kim lah shuh ban ïoh ïa ka eit masi ngi donkam ban pyndonkam da kitei ki dawai kum ka vermi compost, ka multi plex bad kiwei kiwei khnang ba ki jingthung kin heh kin san bad ba kan bha ka thung ka tep.
U bah K. Khongsit, Assistant Engineer, Water Resources haba ai jingkren halor ka ‘Rain Water Harvesting’ u la ong ba ka jingduna um ka la sdang ban paw ym tang ha sor hynrei wat ha nongkyndong ruh namar ka jingkylla ha ka mariang bad ki sawdong sawkun bad dei na kane ka daw ba la sdang ban pyntreikam ïa ka ‘Rain Water Harvesting’ da kaba pynlang ïa ka umslap ha ki pung, ki nan bad lyngba ki tnum ïing da kaba shna da ki top um kiba la pynïaid da ki pipe lem bad ki jaka pynkhuid ne filter kiba lah ban jiar ïa ka um na ka bynta ban long ban pyndonkam.
U la ïathuh ruh ba ka tnat treikam jong u ka la dep ban leh ïa kane ka bynta, ha phyllaw jong ka ophis jong ka Deputy Commissioner, South West Khasi Hills District, Mawkyrwat, ha ophis Khasi Hills Autonomous District Council, Mawkyrwat bad ha Mawthawpdah PHC, Mawkyrat. Haba bynrap halor kane ka rukom pynlang ïa ka um la ju leh naduh ki por mynshwa khamtam ha ki jaka ri shyiap.
U la ïathuh ruh ba kane ka rukom pynlang um ka long salonsar bha ha Tamilnadu da kaba pynshlur bad hikai ïa ki ban ïaleh ban tyngkai, ban pynlang bad ban nang ban kynshew ïa ka um namar ka um ka long kaba kordor kaba khlem ma ka u briew, u mrad, u jingthung jingtep kim lah ban im.
Ha kane ka sngi la ïoh ruh ban sam ïa ki symbai kum u kajor, muli, phresbin sha ki 4 tylli ki aganwadi centers kum ka Mawkyrwat, ka Mawbidong, Sohkhyllam bad Nonglang. Kiba la wan ïa shimbynta ha kane ka snig ki long da ki dkhot jong ki Aganwadi Centres kiba hapoh Mawkyrwat.
Ïa katei ka prokram la pynlong da ophis Child Development Project Officer, South West Khasi Hills District ha kaba ka kong H. Sahkhar, District Social Welfare Officer, South West Khasi Hills District, Mawkyrwat ka la pynïaid ïa ka jingïalang bad ai ïa ki kyntien pdiang sngewbha katba ka kong N. Wanniang, Supervisor ka la ai ïa ki kyntien khublei.
