Shillong, Nailur 07: Hadien shisngi ba ki nonghikai ka Pine Mount School, Shillong ki la ïAkhih da kaba rah lama ïong ban dawa ba ka sorkar ka dei ban weng noh ïa ka Principal jong katei ka skul Kong Aïomksiar, namar ka jingbym lah jong ka ban trei kat kum ka jingdawa jong ka kam kaba la pynlong ïa ki khynnah skul pat ban kylla sohpdung. Ha ka sngi Balang la sakhi ba sa ki kmie ki kpa jong ki khynnah skul ki la mih sha madan ban ai jingkyrshan ïa kaba ki nonghikai ki dawa.
Ki kmie ki kpa jong ki khynnah skul ha ki la leit ruh ban jurip ïa ka jinglong jingman ha katei ka skul bad ki la lap ba ka paiñkhana ka jakhlia bad isait met, ka um kam biang, ki kamra library la shim klas pynban bad kiba bun bah ki jingdkoh kane ka skul.
Ki katto katne ngut ki kmie ki kpa kiba u Mawphor u ïoh ban ïakren ki la ïAthuh ba ka jingkyrshan jong ki ïA ki nonghikai kiba dawa weng ïA ka Principal namar dei ki khun ki kti jong ki hi kiba mad jingeh na ka jingbym lah treikam hok kane ka khlieh pynïAid skul.
Ki la ïAthuh ruh ba ka skul ka ju shim pisa 2,400 na bynta ban pynbha ïA ka skul hynrei ki ong ba kane ka pisa kaba ki siew kam don satia kano kano pat ka dak ka shin ban don ka jingpynbha ïA ka skul.
Ki la kynnoh ruh ba ki don ki kamra klas kiba jaw um beit tang shu slap hynrei ka Principal kam shym la pynsngap wat hadien ba ki la pyrshnag ban ai ka jingujor ïa kane.
Ki la ong ba ha ki kamra ba shong ki khynnah pule klas 11-12 kim don ïa ka bording pynap bad lada lip ka bording bad dum slap ki khynnah skul ki hap ban shong dum.
Shuh shuh la ïoh ruh ban ïakren bad ki khynnah pule bad baroh na kiba ïoh ban ïAkren ki pynpaw ba ka jingjakhlia ka paiñkhana ka dei kawei na kiba khraw tam bad ki ong ba ka jingjaw um ki kamra klas, ka jingbym don nongpynkhuid ïa ki kamra klas ka dei kaba man ka sngi kin hap tip hi ban pynkhuid ïa ki ben shong bad ka kamra klas.
Na ka liang ka sorkar hadien ba kane ka khubor ka la phriang ka la thung ïa ka kynhun tohkit ba don saw ngut ki dkhot ba yn khlieh da u R Rapthap IAS bad ba ïa kaiphot yn aiti sha ka sorkar kloi katba lah bad la bthah ruh ba ki nonghikai kim dei ban pynlong kino kino ki jingïakhih kiban ktah ïA ka jingkyntang ka skul bad ki sawdong sawkun jong ka.
