Nongpoh, Nailur 06: Kiba bun naki shnong ha Ri-Bhoi district kila ud la nam halor ka jingkynduh mawsiang ha kaba pyntrei ïaka skhim MNREGS ne ka skhim bylla 100 sngi, namar ka jingbym pynlait pisa jong ka sorkar ban pyntyllun ïaki kam ki jam naduh ka bai nongtrei, ka bai tiar bai tar bad kiwei kiwei.
Haba phah ïaka kyrwoh naka liang u Bah Bandari Ryntathiang Rangbah Shnong ka Mawpun Kshaid ba dei ruh u President ka CoRP u la pynpaw ka sngewkhia halor ka jingsngap jar jong ka sorkar MDA ha kaba ïadei bad ka jingeh ba ki paidbah ki ïakynduh ban pyntyllun ïaka jingtreikam jong ka skhim MNREGS ba haduh mynta ka sorkar kam shym la pynlait pisa bad bun ki kam pynroi la hap ban pynsangeh noh namar ka jingbym don pisa watla ka dei ka skhim kaba la wanrah shibun ki jingkylla bad ki kam pynroi haki shnong pynban ki shnong ki mad jingeh ha kum kane ka por.
U la ong ruh ba naka liang ka Dorbar Shnong Mawpun Kshaid ka pynrem jur ïaka sorkar MDA bala lam khmat da ka NPP ba tyrkhong lut ki nongtrei job card kumba katei ka skhim ka long ka jingkyrshan bad ka jingkyrkhu kaba khraw ïaki shnong ban ioh ïaki kam pynroi bad khamtam haka iohkam iohjam jong ki paidbah, hynrei kaba sngewsih ba bun naki Dorbar Shnong ki kynduh mawsiang mynta wat ïaki kam kiba la pyndep ban trei.
U la ong ruh ba naka liang ka seng CoRP kan sa lum da ka jingïalang jong ki Rangbah Shnong ha Ri-Bhoi naka bynta ban dawa naka sorkar ba ka dei ban pynlait mardor ïaka pisa bala pynmang naka bynta ka skhim MNREGS naka bynta ka jingbit jingbiang jong ki paidbah bad ki kam pynroi haki shong, u la bynrap.
