Mairang, Nailur, 6: Kum shibynta ban pynurlong ïa ka jingangnud jong ki paidbah ka thaiñ Nongthyllep, Eastern West Khasi Hills District, hynne ka sngi la ïoh ban plie ïa ka Nongthyllep Sub-Centre da u Lamphang ka Ïing Dorbar Thaw Aiñ ka jylla Meghalaya u ba long ruh u MLA ka thaiñ, u Bah Metbah Lyngdoh.
Kane ka prokram plie ka dei kaba la pynlong da ka ophis jong ka District Medical and Health Officer, West Khasi Hills District, Nongstoiñ ha ryngkat ka jingïatreilang jong ka Directorate of Health Services (MI), Meghalaya bad ka Health Engineering Wing Meghalaya, Shillong.
Ha kane ka sngi la sakhi ïa ka jingdon ryngkat lang jong u MDC ka thaiñ, u Bah Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka Distrik u Bah M.B Syiem, ki ophisar jong ki tnat treikam bapher bapher jong ka sorkar, ki nongïalam shnong, ki khynnah pule bad ki paidbah nongshong shnong ka shnong Nongthyllep.
Haba ai jingkren ha kane ka prokram, u kongsan, u Lamphang ka Ïing Dorbar Thaw Aiñ ka jylla, u Bah Metbah Lyngdoh u la ai khublei kyrpang bad u la pynpaw ruh ïa ka jingsngewnguh ïa ki nongtrei ka tnat ka koit ka khiah, ki nongïalam shnong bad kumjuh kito baroh kiba la ïa don bynta ha ka ban pynurlong ïa kane ka Sub-Centre. U la ong ruh ba ka jingplie ïa kane ka Sub-Centre ka long shibynta jong ka jingpyrshang ka sorkar, ban pynjan shuh shuh ïa ki jaka sumar nongpang sha ki paidbah, khamtam eh kito kiba hap hapoh ka jylli treikam jong ka Nongthyllep Sub-Centre.
Haba kren halor ka jingdonkam jong ka koit ka khiah ha ka jingim jong ki briew kaba man ka sngi, u kongsan u la kyntu ïa baroh kiba la sakhi lang ïa kane ka prokram bad khamtam eh ïa ki longkmie kiba armet, ba kin shim kabu ïa ka jingdon jong ka Sub-Centre ha shnong Nongthyllep, da kaba leit sumar bad phah eksamin tista bad ban ïalam ruh ïa la ki khunrit ban ïashimbynta ha ki prokram ai tika ki bapher bapher, ba ka tnat ka koit ka khiah ka ju pynlong na ka por sha ka por.
Kiwei kiwei pat kiba la kren ha kane ka jingïalang plie ïa kane ka Sub-Centre ki kynthup ïa u MDC ka thaiñ, u Bah Batskhem Ryntathiang, u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District, u Bah W. Nongsiej, I District Medical & Health Officer ka West Khasi Hills District, Nongstoiñ, I Dr. S.A Lyngdoh, u Junior Specialist na ka ophis ka District Medical & Health Officer, West Khasi Hills District, Nongstoiñ, u Dr. W.Sutnga bad u Sordar ka shnong Nongthyllep, u Bah M. Ryntathiang.
Lah ban kdew hangne ba ki katto katne ki jingshakri ba ka Nongthyllep Sub-Centre ka don ban ai sha ki paidbah, ki kynthup ïa ka jingsumar ïa ki longkmie ba armet bad ki khunlung, ban ai tika ïa ki khunlung, ka jaka kha khyllung bad ban eksamin ïa ka jingdon jong kino kino ki jingpang kiba ïabit bad bym ïabit ha ki nongpang kiba wan phah sumar ha ka.
