Jowai, Nailur 06: Ka lympung ïalehkai ‘U Kiang Nangbah Memorial Trophy’ Super Division Football Tournament-2022 bala pynïaid da ka West Jaiñtia District Sports Association (WJDSA), kaba la long mynta ka sngi ha madan Kiang Nangbah Stadium Dongmihsngi, Jowai.
Haba phai sha ka jingïakhun hapdeng ki ar kynhun kata ka Shangpung Lumïawmushai pyrshah ïa ka Ladthadlaboh, ka jingïalehkai jong ki hapoh madan kala long kaba ïakhaid bha naduh kaba sdang tad haduh ba kut jong ka jingïakhun kaba la neh da mar 1-1 kol.
Ïa ka shikol na ka Shangpung Lumïawmushai la thep da u rangïalehkai jong ka u Risan Dkhar ha ka minit kaba 15, katba na ka Ladthadlaboh kala lah ban pynphai kylla ïa katei ka shikol da kaba kum thep bakla da u player ka Shangpung Lumïawmushai (Own Goal) ha ka minit kaba 45+1.
Ka jingïakhun lashai ka sngi 7 tarik kan long hapdeng ka Sohmynting pyrshah ïa ka 7 Wasa ha ka por 3 baje janmiet.
