Shillong, Nailur 05 : Ka Nongïalam jong ki MLA Congress ba shah sospon, Dr. Ampareen Lyngdoh ha ka sngi Nyngkong ka la ong ka sorkar kadei ban pynshai lut phar ha kane ka Dorbar Synrai kaban long shen halor ki ishu kiba dang sahteng haduh mynta.
Haba kren bad u Mawphor, katei ka nongmihkhmat jong ka Shillong East ka la ong ba ki don bun ki ishu kiba dang sahteng haduh mynta kata naduh ka ishu ILP, Ktien Khasi bad Garo, nangta ka ishu pynbeit pud nalor kiwei kiwei kiba ka sorkar ka dang hap ban pynshai.
“Kine ki dei kita ki ishu kiba ka sorkar jylla ka hap ban ai ka jingpynshai namar kane kadei ka Dorbar kaba khatduh shwa ba ngin mih madan sha ka elekshon,” ka la ong.
Katei ka nongmihkhmat kaba la jop haduh saw sien ïa ka elekshon MLA ka la ong ruh ba nalade hi kam da don eh shibun ki jingkylli ban rah ha katei ka Dorbar hynrei kan bynrap ne ïarap pat ïa kiba para dkhot haba don ki mat kiba donkam ban ïatai.
Da kaba pynpaw ba haduh mynta ki dang dei ki MLA ba shah sospon ha ka Congress kiba khlem pat noh sha kano ka liang seng saiñpyrthei, ka la ong pat ba kin ïarap ïa ka sorkar ban buh ryntih ïa ki mat ba donkam ban ïatai ha katei ka Dorbar.
“Ngi donkam ïa ki jingtip kiba shai kum ïa ki ishu kiba don ha nongbah Shillong la ka long naduh ki nongdie madan, ka ishu Them-Iewmawlong, ka jingplie ïa ka lynti ban poi sha ka jaka ieng ki bos ki dei ki ishu kiba donkam bha. Nga ngeit ruh ba kin don katto katne ki bynta kiba kane ka sorkar kam pat lah ban pynkhreh haban da kut, hynrei ngi donkam pat ban peit hangno ki don bad kumno ki long kita ki ishu kiba ngi kum ki nongshong shnong ngi donkam ban tip,” la bynrap shuh shuh katei ka nongmihkhmat.
Ka Dr. Ampareen ka ong ruh ba kane kadei ruh ka bynta ba ka sorkar kan shim kabu ïa kane ka sien shong Dorbar kaba khatduh ha ki saw san sngi da kaba pyndonkam bha ïa ka kabu ksiar ba ka la ai ïalade ban pynshai lut ïa ki ishu kiba don.
Lah ban kdew hangne, ki san ngut ki MLA ba shah sospon ha ka Congress hadien ba ki leit ban kyrshan noh ïa ka sorkar MDA ki kynthup naduh ka Dr. Ampareen, Bah Mayralborn Syiem, Bah PT Sawkmie, Bah Kimfa S Marbaniang bad Bah Mohendro Rapsang.
