Shillong, Nailur 5 : Ki kam u Bernard N Marak bad ki kam u Assistant Inspector General of Police (AIGP) A u bah G.K Iangrai ki ïapher bak ly bak, ong u Symbud Myntri Rangbah bah Prestone Tynsong.
U la ong kumne kum ka jingkynthoh pyrshah ïa kaei kaba ka BJP ka dawa ba dei ban weng kam noh ïa une u AIGP ruh uba donkti ban pyndonkam bakla haduh 29 tylli ki kali khnang ban ïoh shimti tohkit da ka CBI.
Ka BJP ka la kynnoh ba ka sorkar ka la kynton ki jingpynngat kyndon ïa u Bernard ban pynkut ïa ka saiñ pyrthei jongu hynrei ïa une u AIGP pat ka khlem leh ei ei.
U bah Prestone u la ong “ Ki kam bad jingleh jong u Bernard bad ki kam bad jingleh jongu Iangrai ki ïapher bak ly bak bad ka Committee kaba tohkit halor kane ka kam la dep thung hi ruh da ka tnad pulit.
“Kumta halor kane ka kam jong u Iangrai to ngin ïa ap haduh ban da ioh ïaka kaiphod na ka committe bad hadien kata yn sa leh ia kaei kaba dei ban leh. Ki kam u Bernard kim dei ki jingpyndonkam bakla ïa ka pisa ne kali ki dei da kiwei ki kam beaiñ ba la lap tyngkreiñ da ki bor ka aiñ” ong u Symbud Myntri Rangbah.
