Shillong, Nailur 5 : U Symbud Myntri Rangbah ka jylla ubah Prestone Tynsong u la ong ba yn pynshitom kat kum ka aiñ lada dei shisha ba ïa ka jaka ha Maxwelton Estate la pyndonkam da ki poi ei.
U la ong kane ka kam ka hap ha ka jingpeit jong ka Deputy Commissioner (Revenue) kumta ka DC Revenue kan leh ïa kaba donkam lada ka lap ba ki don ki poi ei kiba sah ne pyndonkam ïa katei ka jaka.
Ha ka 1 tarik mynta u bnai ki nongïalam jongka KSU ki la leit ïakynduh bad dawa na ka DC, East Khasi Hills ba kan weng noh mardor ïakitei ki poi ei kiba sah ha katei ka jaka ha Maxwelton Estate kaba don kumba 9 acre bad ka hap hapoh u pud u sam ka Dorbar Shong Kenches Trace Oxford Rilbong.
Ha ka shithi ba la ai sha ka DC ka KSU ka la pynpaw ba ka kyrpad ïa ka DC ban weng noh ïakitei ki poi ei kiba sah beaiñ ha katei ka jaka kiba la thaw jingkulmar bha bad leh ïa kiba bun ki kam runar kiba pynshongsyier ïa ka shnong ka thaw bad ka imlang ka sahlang. Ka KSU ka la pynpaw ruh ba kitei ki poi ei ki sah ha katei ka jaka khlem da ïoh jingbit na ka Dorbar Shnong. Ki la shu wan buhai shnong beaiñ hi ha katei ka jaka khlem da ïoh jingbit nangno nangno ruh. Ki la shna ïing trep plastic bad ym don ki jaka wat tang ki paiñkhana ruh bad baroh ki jaboh jabaiñ ki tuid lut sha ka wah duid bad kane ka la wanrah bun jait ki jingpang ha katei ka thaiñ.
Nalor kata kine ki poi ei ki ri ruh ïa ki masi bad kiwei kiwei ki jingri ha katei ka jaka kaba long beaiñ namar ka dang hap hapoh ka Shillong Municipal Board bad kane long kum ka jingpynkheiñ ïaka Meghalaya Municipal Act.
Ka KSU ka la pynpaw ba wat hadien ba la ïoh jingtip ki bor synshar kim shym la leh ei ei namar ha shwa kane ka KSU kala dep ujor sha ka Shillong Municipal Board. La ong ba kane ka jaka mynta ka la kylla kum ka ktem jong ki kam awria, ki kam runar. La bun ki jingjia kiba la jia ha katei ka jaka ba la leh da kine ki poi ei. Ka long ka jaka jong ki kam dakaid, ki kam khaïi tuh, drok, ka ktem ki nongtuh nonglute bad ka la buh ïa ka ïaid ka ïeng ki kynthei khynnah ha ka jingma kaba khraw.
