Jowai, Nailur 05: Ka ophis jong ka District School Education Officer, West Jaiñtia Hills District mynta ka sngi kala kynmaw burom ïaki sngi ba kyrpang jong ki nonghikai ne ka (Teachers’ Day) ïa kaba la pynlong ha Tpep-Pale Auditorium Hall Jowai.
Ïa ka jingïalang la pynïaid da ka kong C. Lyngdoh, Sub Inspector of Sub-Divisional School Education Officer, West Jaiñtia Hills District bad la ka jingkren pdiang sngewbha sha baroh ki nongwan sha kane ka prokram da ka kong A. Syiem, DSEO, West Jaiñtia Hills, ha ka jingïadonlang u kongsan ma Wailadmiki Shylla (MLA), ka kong DD Syngai MCS, ADC West Jaintia i symbud Kongsan, ki Principal jong ki skul bapher bapher ki nonghikai bad ki khynnah skul ka nongbah Jowai.
Ha kane ka sngi la don ruh ka jingpynkup burom ïa ki nonghikai bad ruh ïa ki Scout & Guide Master ha ka juh ka por kiba long ruh ki nonghikai hapoh West Jaiñtia Hills District. Ha ka kyrdan Secondary Level la pynkup burom ïa u Hubert Thyrniang M.Sc (Physic) Assistant Teacher, Government Girls Higher Secondary School, Jowai, ha ka Upper Primary Level la ai khusnam ïa ka Fabriously Suchiang B.A, Trained, Headmistress Shangpung Government U.P School, ha ka Lower Primary Level la pynkup burom ïa u Beyond Lanong M.A (Political), Head Teacher Sohkha Shnong L.P School ba la ia khusnam ruh sha u Teilang Rymbai A/T Achiver Secondary School, Ummulong bad ïa ka Rosie Bang, Ranger Leader Thomas Jones Synod College Jowai.
Haba ai jingkren na ka liang u kongsan ula pynsngew shaphang ki kam ba ki nonghikai kiba synñiang sha ki khynnah bad ki samla pule, ula ong ba ki nonghikai ki long ha ka juh ka por ki nongsneng nongkraw ki paralok kiba ïajan eh bad ki khynnah skul.
U ma Shylla ula pynkynmaw halor ka jingtrei shitom jong ki nonghikai ha kine ki ar snem bala dep na ka daw ka jingwan lyngshop ka khlam Covid-19, ha kaba ki nonghikai kila hap ban ai jinghikai sha ki khynnah lyngba ka online Class kaba la ïapher bak lybak ïa ka rukom ai jinghikai kaba baroh shi katta, hynrei wat lada ka long kaba eh hynrei baroh ki nonghikai ki la trei shitom ban pyndep ïa la ka jong ka kamram.
Ha kane ka sngi leh burom ïa ki nonghikai la pynshongkun shuh shuh da ka jingïashim bynta ki khynnah skul ha ki jingrwai, ki jingshad bad kiwei de.
