Jowai Nailur 05: Ka 5 tarik u Nailur la tip ïa ka kum ka sngi kyrpang ki nonghikai ha shityllup ka Ri ne ka Teachers’ Day, kumta kumba long ha kiwei ki jaka ki khynnah skul da ka jingsngewieit bad burom ïa ki nonghikai ki la pynlong ki prokram bapher, kumta ruh ka ‘Shlem Hikai Tynre, Seinraij Jowai’ ha ka 4 tarik Nailur kala pynlong ïa ka prokram kyrpang ha Seiñraij Higher Secondary School Jowai.
Ha kane ka jingïalang la wan ban sakhilang da u Raymond Nartiang, Pator Raij Jowai, ki nonghikai bad ki longkmie longkpa, u Budwanmi Dkhar bad ka Daman Lamar ki la long kum ki nongpynïaid, katba ka Dasien Pakynteiñ ka la ai ki kyntien pdiang burom bud pat ka nguh ka dem na ka Kongka Shylla bad haba kut pat ka Wanchwa Sungoh kala ai ki kyntien sngewnguh.
U Pa Dalloi ka Elaka Jowai Wh.Puramon Kynjin kum u Kongsan jong kane ka sngi ba long ruh u nongprat lynti ïa ka Shlem HikaiTynre naduh u snem 1997, haba ai jingkren ula ai ka jingïaroh ïa ka jingshimkhia ki khynnah ban pynlong ïa kane ka sngi burom ïa ki nonghikai kiba long kum ka Sharak ba ai jingshit bad jingshai ïa ki khynnah shaphang ka tipñiam tip rukom bad ïa ka riti ka dustur.
Kum u nongprat lynti ka Shlem Hikai Tynre naduh u snem 1997 ryngkat ka jingïatreilang ki riewrangbah ka Seinraij da ka jingsngewsarong u ong ba kat nangmih ki sngi ki snem ki Shlem Hikai Tynre ki la nangbun haman ki Raij ki shnong bad kane ka long ka dak jong ka jingkyrmen ïa ka ri bad ka jaitbynriew kumjuh ïa ka pateng kaba dang bat ban pynim pynneh pynsah ïa ka ñiam ka rukom, dustur u Hynñiewtrep Hynñiewskum.
