Ka jingtreishitom ryngkat ka jingïaineh & ïaishah ka long kaba i tynnad ba ki nonghikai ki don: Renikton

Mawkyrwat, Nailur 05: U bah Renikton Lyngdoh Tongkhar, Nongmihkhmat jong ka Mawkyrwat Constituency bad Myntri jong ka tnad Umbam Umdih ka Sorkar Meghalaya haba kren kum u kongsan ha ka jingrakhe ïa sngi ba kyrpang ki nonghikai ne ka 61st Teacher’s Day 2022 bad kumjuh ruh ka jingrakhe ïa jingdap 25 snem tam jong ka ‘Hep Memorial Primary School, Sakwang’ (HMPSS) u la pynkynmaw ryngkat ka jingaimynsiem ïa ki nonghikai ba ka ‘jingtrei shitom ryngkat ka jingïaineh bad jingïaishah’ ka long kaba donkam khnang ba kin lah ban pyntyllun ïa kam ban ai jingshakri lyngba ki lad jinghikai.
Ha kajuh ka por u la ai khublei ruh na ka bynta ki kmie ki kpa, ki khynnah skul bad kumjuh ruh ki nonghikai skul ba wat hapdeng jong ki jingeh kiba bun ba ki ki ïa kynduh ha ka jingpyntyllun ne ban don ka jingïatreilang ban pynïaid beit pynïaid ryntih ïa ki kam ha kaba ïa dei bad ka jingnang jingstad hynrei ki la don shisha ïa kata ka mynsiem jong ka jingïaishah. Namarkata, ka long kaba dei ban ai khublei kyrpang eh ïa ki nonghikai kiba la len ïa lade ha kane ka bynta.
Ha kane ka sngi u la ai khublei kyrpang ruh na ka bynta ki nonghikai kiba dei ki nongïadon bynta ha kane ka skul ban ai ki jingshakri lyngba jinghikai ïa ki khynnah skul naduh ki snem kiba la leit haduh mynta ha kaba ki la long shisha ki païa ba skhem na ka bynta ki khynnah, ki khun samla bad jong ka shnong ka thaw ruh.
Ha kaba ïa dei bad ki lad jingïarap na ka bynta kane ka skul ba u la ïoh ïa ka dorkhas, u bah Renik u la kular ba lada ka lad ka plie un sa leh ei ei halor kane ka jingkwah jong ki nonghikai bad kumjuh ruh ki nongpynïaid skul. “Ban tei bad ai jinghikai ïa ki khynnah ha ka liang ka jingnang jingstad, ka nongrim ba skhem ka long ba donkam haduh katta katta”, ong u bah Renikton bad namar lada ym lah ban pynïeng bha ïa ka nongrim ha kano ma ka por kan sa khyllem.
Ha kaba ïa dei bad ka dorkhas ba kum ka skul ka la phah sha u bah Renikton Lyngdoh Tongkhar, Nongmihkhmat jong ka Mawkyrwat Constituency bad Myntri jong ka tnad Umbam Umdih ka Sorkar Meghalaya, ki la buh ka jingkyrpad ba na ka liang jong u un mang jingïarap kyrpang na ka MLA Scheme ne na kino kino ki lad jingïarap na ka sorkar khnang ban ïoh pyndep ban sha ïa ka jingtei ba dang sah, kiwei dei ki jingshna bad sa kawei de kum ka skul kan sa pynkiew kyrdan noh sha ka Upper Primary School.
Ban ai mynsiem shuh shuh ïa ka jingtrei shitom jong ki nonghikai, na ka liang ka skul ka la ïoh ban kup burom ïa ki 3 (lai) ngut ki nonghikai kata Shiningstar Kharjahrin, Stemly Kharjahrin bad Refullin Kharjahrin ha ryngkat ka jingai ïa ki syrnod sha ki katto katne kiba la noh synñiang ban pyntyllun ïa ka kam kaba ïa dei bad ka jingnang jingstad.
Ha kane ka sngi la ïoh ruh ka jingkren na u Symbud Kongsan, u bah D. Nongsiej, SDSEO, South West Khasi Hills District, ka jingpule bad aiti ïa ka dorkhas da u bah Shiningstar Kharjahrin, Head Teacher jong ka Hep Memorial Primary School, Sakwang, ka jingpule ïa ka jingïaid lynti jong ka Hep Memorial Primary School, Sakwang da ka kong Stemly Kharjahrin, Assistant Head Teacher, ka jingkren lyngkot na u bah Polanding Sohphoh, Secretary Managing Committee.
Ïa ka jingïalang la pynïaid da u bah Tony Nongsiej bad ka jingkren khublei na u bah Dorjling Sohphoh, President ka Hep Memorial School bad Voluntary Organisation, Sakwang.