Nongstoiñ, Nailur 5: Namar ka jingjyllei jong u droks ha kylleng ki jaka ha ri Khasi bad Jaiñtia, ka Jingïaseng kynthei jong ka Khasi Jaiñtia Presbyterian Synod lyngba ka Temperance Committee, ka la bynshet ha ka Jingïaseng kynthei jong ka Nongstoiñ Presbytery, ba kan pynlong ïa kino kino ki prokram ba kyrpang ban pynsgewthuh ïa ki paitbah halor ka jingsniew jong u drok.
Halor kane, ka Jingïaseng kynthei jong ka Nongstoiñ Presbytery ka la aiti ha ka Balang Presbyterian New Nongstoiñ ba kan shim ïa katei ka bynta, ha kaba ka Jingïaseng kynthei Balang New Nongstoiñ ka la shim ïa katei ka bynta.Nalor kata ka Jingïaseng kynthei Balang Presbyterian New Nongstoiñ ka la aiti ha ka Jingïaseng kynthei balang Presbyterian Nongstoiñ, ba kan pynbit pynbiang ïa ka drama ban pynsngewthuh ïa ki paitbah ba u drok, u dei u jingdih uba sniew uba ktah haduh katta katta ïa ki longïng longsem bad ka imlang sahlang.
Kumta mynta ka sngi kitei ki art ylli ki Jingïaseng kynthei ki la pynlong ïa ka prokram ba kyrpang ha khmat ïew Nongstoiñ kaba la ring dur janai bha halor ka jingsniew jong ka jingkyrni dih drok.
Ha katei ka sngi la pynïaid ïa katei ka prokram da ka kong I.M Nongsiej nangta la ïoh la ïoh ban ïarwai lang da ka jingrwai na ka kot jingrwai KHB No 526 kaba ong “Ah Trai to khot I’u paitbah ba bun” bad la ïoh ban pule na ka Ktien ka jong u Blei bad duwai da ka kong F.Lyngdoh Nongpiur.
Ha kajuh ka por la pdiang sngewbha ïa ki paitbah da ka kong T.Snaitang bad la pynbud da ka jingrwaikyrpang da ki longkmie ka balang Presbyterian New Nongstoiñ. Hadien kata ka Jingïaseng kynthei balang Presbyterian Nongstoin ka la sdang ïa ka drama bad mar ïasdang ki paitbah ki la sdang ban ïatur shakhmat kata naduh ki rangbah, ki longkmie ki samla bad ki khynnah.
Katei ka drama jong ka Jingïaseng kynthei Balang Presbyterian Nongstoiñ, ka la ktah haduh katta katta ïa ki paitbah nongpeit bad ka la pynlong ïa kiba bun ki nongpeit ba kin jaw ummat namar ka jing ktah jong katei ka drama. Katei ka prokram ka long ruh ka jingmyntoi lada ki don ki nongpeit kiba la shah pyngop ha utei u jingdih ba sniew, ba kin pyrkhat bad pyrshang ban kiar lada ki kwah ban lait na ki jingeh.
