Nongstoiñ, Nailur 5: Sa shisien ka New Nongstoiñ Sports Social and Cultural Club, ka la pynbna paidbah ban sdang biang ïa ka lympung kaba heh hapoh sor Nongstoiñ kaba ju pynlong ha madan shnong New Nongstoiñ.
Kumban shu pynkynmaw ba kane ka lympung la ju pynlong ha ki snem kiba la leit noh, ha kaba ki kynhun phutbol ba pawnam ba napoh ka Jylla bad don ruh wat kiba na shabar kiba la wan ban ïashimbynta na bar jylla kumjuh. Hynrei, ha kine ki ar snem tam ka la don ka jingdkoh noh na ka daw ka jingwan ka jingpang khlam Covid.
Pynban, watla katta ruh kane ka lympung ban pynlong biang da ka NNSSCC, mynta ka kynti lei lei kan kham heh kham shongshit shuh shuh, namar ka kynhun ka ban rah ïa ka nam lahduh kan khur ïa ka song tyngka kaba haduh 7 lak ryngkat ka trophy. Katba kaba wan ba ar kan ïoh ïa ka song tyngka kaba 3 lak ryngkat ka trophy.
U Bah K.Thongni Publicity Secretary jong ka synjuk, ha ka kyrwoh khubor ba u la pyllait mynta ka sngi u la ong ba ïa ka Invitation Knock Out Football tournament 2022-23, kan sdang naduh ka 31 tarik u Risaw mynta u snem ha madan New Nongstoiñ.
Kumta, u la kyntu sha baroh kiba kwah ban shim bynta ha kane ka lympung, kin ïakynduh noh kham kloi ïa ki nongkitkam jong ka synjuk kiba don ha Nongstoiñ. Yn shim tang ïa kumba 16 Teams bad yn sdang ïa ka jingïalehkai naduh ka Round 16.
