Ba rem ha ka Mawsawrit hiar kyrdan 2nd Division ka Phanniewlah Rum ha ka football TASA

Shillong, Nailur 05 : Ka Phanniewlah Rum SC ka la hiar noh sha ka kyrdan Second Division ha ka lympung ïalehkai ba la pynïaid da ka Tyrsad Area Sports Association (TASA) hadien ba ka la mad nam rem da 3-0 kol ha ka Mawsawrit SC ha ka jingïalehkai First Division kaba la long ha ka sngi Nyngkong.
Haba phai sha ka jingïakhun hapdeng kitei ki ar tylli ki team, ka jingïalehkai ka long kaba ïakhaid bha bad dei ka Phanniewlah Rum kaba la ïoh ban plie pyrda nyngkong ha ka jingïalehkai kaba dang ïaid hynñiew minit jong ka kylla step. Ïa katei ka shi kol la thep da u John Anthony Ryntathiang ha kaba ka Phanniewlah Rum ka la lamkhmat da 1-0 kol ha kaba kut jong ka kylla step.
Haba wanphai sha ka jingïalehkai jong ka kylla miet, ka jingïalehkai ka la kylla pynban da khongphong ha kaba ka Mawsawrit SC ka la lah ban ïalehkai bha bad pynphai kol. U Romidasing Nongrum u la ïoh ban thep nyngkong ïa ka kol pynïakhaid ha ka minit ba 58 jong ka jingïalehkai kaba la ai mynsiem ïa ka kynhun.
Lyngba katei ka shi kol ka Mawsawrit ka la nang ïakhun tyngeh bad ha ka minit ba 61 u Shlurbor K Shilot u la thep ïa ka kol pyntam na bynta ka Mawsawrit bad tang mar ïa sdang biang ka jingïalehkai u Romidasing Nongrum u la thep ïa ka kol kaba ar bad kaba lai na bynta ka Mawsawrit SC ha kaba ka la pynliem syndon da 3-0 ïa ka Phanniewlah Rum.
Ha kawei pat ka jingïakhun jong ka First Division ka Umkaber SC ka la jop ïa ka Bara FC da 3-0 bad ïa kitei ki lai kol la thep marwei da u Pynshai Kharbteng ha ka minit ba 58, 80 bad 82 jong ka kylla miet.
Ka jingïakhun semifinal jong ka lympung ïalehkai Second Division jong ka TASA kan long ha ka 8 tarik Nailur 2022 hapdeng ka Rangshangkham SC pyrshah ïa ka Mawrohroh SC ha ka por 1 baje janmiet. katba ka jingïalehkai ha ka First Division kan long hapdeng ka Umkseh SC pyrshah ïa ka Mawsawrit SC ha ka por 3 baje janmiet.