New Delhi, Lber 29: Ka sorkar Meghalaya bad ka sorkar Assam, mynta ka sngi ki la ïasoi ïa ka soskular ban mynjur ïa ka jingpynbeit pud thymmai ha ki 6 na ki 12 tylli ki jak ba don jingïakajia mynta la 50 snem kynthih.
Ïa kane ka jingïasoi soskular la ïasoi ha nongbah Delhi da u Myntri Rangbah ka Meghalaya, u Conrad Sangma bad u Myntri Rangbah ka Assam, u Himanta Biswa Sarma ryngkat ka jingïadon lang u Myntri Korbar ri ka ri India, u Amit Shah, ki Myntri ka sorkar na Meghalaya bad Assam bad kumjuh ruh ki ophisar ka tnad korbar ri.
Ki 6 tylli ki jaka kiba ladep ban ïamynjur da kaba ïa ai bad ïashim ki long ka Hahim, Gizang, Tarabari, Boklapara, Khanapara-Pillingkata bad ka Ratacherra.
“Kan dei ka sngi ban sah kynmaw na ka bynta ka jylla bad na ka bynta ki paidbah, namar yn pynkut noh ïa ka jingïakajia pud ha kine ki 6 tylli ki jaka hadien 50 snem”, la ong u Conrad Sangma, hapdeng ka jingïadon lang u Sarma, u Shah bad ki Myntri ha nongbah Delhi.
Kane ka jingïasoi mynta ka sngi, kadei ka bynta kaba nyngkong jong ka jingïapynbeit kaba la sdang naduh u snem baladep, ha kaba la thung ruh ïa ki Regional Boundary Committee kiba la leit jurip ruh ïa kine ki hynriew tylli ki jaka bad ïakynduh ruh ïa ki nongshongshnong jong kine ki jaka.
Don napdeng kine ki shnong kiba ki paidbah ki la jied hi ban leit sha ka Assam ne ban sah ha Meghalaya.
U Conrad, u la ong ba kane ka jingïasoi mynta ka sngi kan long ruh u mawjam sha ka jingïapynbeit pud ba pura hapdeng kine ki artylli ki jylla ba marjan.
Ha kajuh ka por u Conrad, u la ai khublei ïa u Myntri korbar ri, u Amit Shah, uba la long u nonglam lynti ïa kine ki artylli ki jylla sha ka jingïapynbeit pud da ka lynti kaba jai jai.
U la ai khublei ruh ïa ki dkhot jong ki Regional Boundary Committee na baroh artylli ki jylla, kiba la trei shitom ban pynurlong ïa kane ka jingangnud kaba la sanphew snem jong ki paidbah ka jylla. U Conrad u la ai khublei ruh ïa u Myntri Rangbah ka Assam bad ka kynhun Myntri baroh kawei kiba la ïatreilang na ka bynta ban pynpoi sha kane ka jingthmu ba bha na ka bynta ka Meghalaya bad ka Assam.
Ha shuwa jong kane ka jingïasoi, ka Meghalaya bad ka Assam ki la ïasoi ruh ïa ka Memorandum of Understanding (MoU) bad ka Assam hadien ba la ïoh ïa ki kaiphod na ki Regional Boundary Committee. Nangta u la lum ruh ïa ka jingïalang jong baroh ki Political Party, ki bor synshar jong ki District Council, ki bor Hima bad kumjuh ruh ki Sengbhalang ban batai pynshai halor kane ka jingïapynbeit pud.
Lah ban kdew hangne ba ïa kine ki 12 tylli ki jaka ba don jingïakajia pud bad ka Assam, la sei madan ha ka snem 2010 ha ka por ba long Myntri Rangbah u Dr. Mukul Sangma, lyngba ka jinglum ïa ki kot ki sla na ki Hima na ki District Council bad la phah sha ka Assam ba kan peit bad tip ïa kine ki jaka ba don ka jingïaknieh pud bad ka Assam.
