Shillong, Nailur 04: U MLA jong ka North Shillong u Bah Adelbert Nongrum haba kren bad u Mawphor haba ïadei bad ka jingpynkhreh jong u ïa ka ilekshon sha ka Ïing Dorbar thaw aiñ ka jylla ha u snem ban wan, u la ong ba na ka liang jong u u la pynkhreh ban ïa khun ïa ka ilekshon ha ka rukom lajong ym kum kiwei ki kyrtong kiba pynlut da ki lak tang na bynta kawei ka jingïalang.
“Kiwei kiwei ki kyrtong ngi sakhi ba kawei ka jingïalang paidbah kaba ki pynlong ki pynlut da ki lak tang ban shna ïa ka dara ruh, ba ka pisa kaba ki pynlut hangne ka dei ka ram kaba ki paidbah nongjied ki la kit lypa hynrei na ka liang jong nga nga ïakhun da ki nongrim bad lada ngan jop ruh ngan ïoh ban trei beit na bynta u paidbah khlem donkam pykhat khuslai ban siew ram” u la ong.
U la ong ruh ba na ka liang jong u kum u MLA un leit ai jingkheiñ sha khmat ki paidbah kaei kaba u la pyrshang ban wanrah ïa ka roi ka par sha ka constituency ha kine ki snem kiba u la leh.
Haba ïadei bad ka jingrai ban ïakhun ïa ka ilekshon na ka seng VPP u Bah Adelbert u la ong, “kaei kaba nga kren bad kaba nga pyrshang kam don da kiwei pat ki seng kaba ka phalang kham shai ban ïa ka VPP. Ngi sakhi ha ka jinglong MLA bad kum u nongïalam u Bah Ardent bunsien u hap ïeng marwei hynrei khlem ïapeiñ ïa ki nongrim kiba u ïeng, nga ruh ki paidbah ki sakhi ba kiba bun ki khep nga hap ïeng marwei haba kren ïa ki mat bad ki jingeh ka jaidbynriew bad ka jingleit sha ka VPP ban donlang ha ka juh ka kynhun bad u Bah Ardent ngam ar tatien ba ngin lah ban trei kham bha na bynta ka jaidbynriew” u la ong.
