Hapoh shibnai yn rai ka BJP ban weng noh na ka sorkar MDA : Chuba Ao

Shillong, Nailur 3 : U National Vice President ka BJP uba dei peit ïaka jylla Meghalaya u Dr Chuba Ao mynta ka Sngi Saitjaiñ u la ïathuh ba ka BJP kan sa shim ïa ka rai ba khatduh hapoh shibnai la kan weng noh ne kan dang neh hapoh kane ka sorkar synrop lang Meghalaya Democratic Alliance (MDA) hapoh ka jingïalam ka National People’s Party (NPP).
“ Ngi la pynkhreh ban shim rai hapoh shibnai la ngin weng noh ne ngin dang neh ha kane ka sorkar namar mynta ka jingïakren ka dang ïaid shakhmat bad u National President ka BJP” ïathuh u Dr Ao ha ki lad pathai khubor.
U la kynnoh ba ka NPP ka ïalam ïaka sorkar MDA ha syrngiew jongka BJP hangne ha Meghalaya hynrei ka BJP kam donkam ban shaniah ha ki ban pynïaid ïa ka sorkar , ong u Dr Ao.
U la ong “ Ngi la ïatreilang baroh shi katta namar ki don ki jingthmu jongngi bad balei ba ngi mut ban weng noh na kane ka jingïatrei lang kata ka dei kawei pat ka bynta kaba ngi dang ïa bishar bha mynta”.
Halor ka jingkylli kumno u sngew ba ka NPP ka la rai ban ym ïatrei lang bad ka BJP ha kane ka election ban wan, u Dr Ao u la ong ba ula ïohi ïa kane ka jingkren jong ki nongïalam ka NPP khamtam na u Naitonal President jongka u Conrad K Sangma ba ka NPP kan leit marwei sha ka election MLA 2023 hynrei u la ong ba kynmaw tang kawei khlem ka BJP ym don ba lah ban thaw ïaka sorkar ba thymmai ha Meghalaya.
“Kata ka dei ka rai jongki bad ka BJP kam don ei ei ban ong. Ngim lah ban pynbor ïa ki lane ngim lah ban khroh ïa ki hynrei khlem ka jingkyrshan ka BJP ym don ba lah ban thaw sorkar thymmai ha kane ka jylla nga nud ban kob” ong u Chuba Ao.
Ha kaba ïadei bad ki jingkynnoh bamsap jongka BJP pyrshah ïa ka sorkar MDA, u Dr Ao u la ong “: Ngi la ïoh pdiang ïa ki jingujor hynrei kaba sngewsih ka long ba ngi khlem ïoh ki kot ki sla ban pynshisha. Ngi dang ïai ap ïa kane bad ngi tang shu ïoh ngin sa aiti sha ka ED ne CBI lane sha kano kano ka tnad tohkit. Na ka liang ka Party ka la bthah ïa ki dkhot jongka ban tih bniah ban ïoh ïa ki kot ki sla kiba biang”.
Halor ka kam weng president ïa u bah Ernest Mawrie wat la dei u Chuba Ao hi uba sdang ban pynpaw pyrthei bad kynnoh lai phew jait ïa u bah Mawrie hynrei kaba lyngngoh pat ka long mynta ka sngi dei ma u pat uba pynkynran tyllaw ding halor kane ka jingdawa weng President ïa u bah Mawrie da kaba u ong ba ka ju jia hi ka jingbym ïa sngewthuh jingmut ne ka jingbym ïa shai ka rukom ïakren ïa pyrthew.
Haba la kylli balei ki don ki nongïalam bad ki dkhot ka BJP na kane ka jylla kiba kwah ban pynhiar shuki ïa u bah Mawrie, u Dr Ao u la ong “ Kata ka dei ka jingsngew bad jingshem jongki shimet shimet. ïa ka party donkam ban ialam da mano mano bad mynta u bah Mawrie u dei u nongïalam . Ka lah ban don ka jingbym ïashai ne bym iasngewthuh jingmut hangne hangtai, haba don kum kita ki dkhot ki la dei ban wan beit sha u ne sha u President ka party hi ban pan jingpynshai ban ïa kaba leit sha ki lad pathai khubor”.
U la ong ruh ba kam don kano kano ka jingthmu ban wanrah da uwei ha ka jaka u bah Mawrie. U Dr Ao u la pynshai ruh halor ka jingmih khubor halor jongu da kaba u ong kam dei kaba u la kren sha ki lad pathai khubor hynrei ki don kiba phone ïa u bad pyntip shaphang kiei kiei bad kane ka la ktah ïa ka jingsngew jongu bad ha kum kata ka jingsngew u la kum kren bad ki don kiba record bad phah ïa kata kaba u kren sha ki lad pathai khubor.
U la ong “ Baroh ngi don la jongka jingkit khlieh hynrei teng teng ki don ki jingïasngew thuh bakla lane ki jingshah ïalam bakla ruh da kumne kumtai hynrei kumba long hi ka BJP ka ïatylli kawei ym don kata ka jingïapait ïapra”.
Haba la kylli kumno u kynnoh ba u bah Mawrie u dei u agent ka NPP u Dr Ao u la da rapjot ïa lade da kaba tei pop ba ha ka saiñ pyrthei ka don ka rukom kren kaba ki briew ki lah ban sngew da kumne kumtai hynrei ha ka politik ym ju don kyntien ban ïai neh shitra.
U la pynshai ruh ba kam don ka jingïapait ïapra hapoh ka BJP bad baroh ki dkhot ki ïatrei lang sha kajuh ka thong.
U la tep eitmiaw shuh shuh halor ki jingkren laplah jongu da kaba u ong ba wat ki MLA ruh ki lah ban duh tiket, ïa katei lah ban kren halor ka jingbym tip hynrei kaba shai kdar ka long ba ym dei ma nga ne ma u ban shim rai, ki don ki nongsorjamin ban bishar lada jia ba ym poi ka jingïoh jingkyrshan kaba 50 % bad baroh ki briew ki tip ba un rem beit kata ka mut ba un duh beit ïa ka tiket kata ka dei ïano ïano ruh.
U la ong ba ka party kam ju rai lypa ïa u kyrtong Myntri Rangbah namar kane kan long hadien ka election. Hynrei tang kawei kaba u la pynthikna ka long ba ka BJP ka pynkhreh ban pynïeng kyrtong na baroh 60 tylli ki constituency.