Shillong, Nailur 03: U heh Pulit ba la shong thait ka jylla u Bah Mariahom Kharkrang ha ka sngi Saitjaiñ u la leit ban pynïasoh pura sha ka seng BJP ha ka jingdon ryngkat u Arjun Ram Meghwal Myntri Khynnah ka sorkar pdeng ba peit ïa ka tnad la riti, u Chuba Ao bad u BL Santosh ha ka ophis treikam ka BJP ha nongbah Shillong.
Haba kren sha ki nongthuh khubor u Bah MH Kharkrang u la ïathuh ba ka jingleit pynïasoh jong u sha ka BJP ka dei namar ba ka BJP ka dei ka seng kaba buh thong ïa ka roi ka part ym ïa kiwei pat ki mat.
Haba ïadei bad ka ilekshon u la ong ba na ka liang jong u un pan tiket na bynta ban ïakhun ïa ka ilekshon ha u snem u ban wan kum u kyrtong jong ka BJP. U la ong ba ha kaba ïadei bad ka tiket ka rai kan shong ha seng ban rai ïano kan ai tiket.
Haba jubab halor ka jingkylli ba haduh katno kan wanrah jingshong shngaiñ ïa ki nongshong shnong lada un wan sha ka bor namar kane ka dei ka constituency kaba shong khleh jaidbynriew u la ong ba um dei shuh u briew uba thymmai ha kaba ïadei bad ka Law and Order bad baroh ki paidbah ki la sakhi kaei kaba u la leh mynba u dang long kum u SP jong ka East Khasi Hills ha ki khyndiat snem kiba la dep.
Kum ban shu kdew hangne ba ki kyrtong kiba la pynbna ban ïakhun na North Shillong ki long u Bah Adelbet Nongrum MLA ba mynta uban ïakhun na ka VPP, u Bah Ransom Sutnga u Chief Engineer ba la shong thait ka PWD na ka seng NPP , u Dr Aman War DHS barim na ka UDP, Elgiva Rynjah na ka AITC.
