Shillong, Nailur 3 : Shen ka sorkar pdeng kan plie noh ïaka Tribal Museum ha Meghalaya bad hangne yn buh pynsahnam ïa ki rukom im tynrai jong ki trai ri trai muluk kane ka jylla naduh ka shad ka mastieh, ka rwai ka siaw, ka rep ka riang, ka rukom im bad ter ter.
ïa kane la ïathuh da u Arjun Ram Meghwal, myntri khynnah ka sorkar pdeng ba dei peit ïaka tnad Culture. Ha kane ka Museum yn buh ïa ki dur jong ki khlawait ka jylla, ka kolshor, bad kiwei kiwei ki rukom im tynrai.U la ïathuh ba ka sorkar pdeng ka shu ap ïa ka sorkar jylla ban ai ïa ka jaka ban tei ïa kane ka museum.
U la ong ïa kane yn bei pisa beit da ka sorkar pdeng bad ka sorkar jylla kan shu hap ban pynbiang tang ka jaka.
