ñiew tang u Arjun Ram Meghwal ïa u synñiang u Tirot Sing, Kiang Nangbah bad Pa Togan Sangma

Shillong, Nailur, 03: U Myntri Khynnah ka Sorkar Pdeng uba khmih ïa ka tnat Culture bad Parliamentary Affairs, u Arjun Ram Meghwal ha ka sngi Saitjaiñ u la ñiewtang ïa u synñiang u bynhei jong ki nongïaleh laitluid kane ka Jylla kiba kynthup ïa u Syiem Tirot Sing, u Kiang Nangbah bad u Pa Togan Sangma ha ka jingpynkut ïa ka prokram ‘ka tynrai jong ka longrynieng’ kaba la long ha u Soso Tham Auditorium, Shillong.
“Ka kyrteng jong u Tirot Sing ka long kaba khraw. Baroh ki dei ban tip shaphang jong u,” u la ong katba u la kren shaphang ka bynta jong u ha ka jingïakhih na ka bynta ka jinglaitluid jong ka ri India pyrshah ïa ki Phareng.
U la kren ruh shaphang u Kiang Nangbah bad u Pa Togan Sangma kiba la don ka bynta kaba khraw bad u la ong ba ka jingpeit bniah jong ka Sorkar Pdeng ka dei ban ai jingtip ïa ki samla shaphang ki khlawait ki bym paw pyrthei.
U Meghwal u la batai ruh shaphang ka jingthmu jong ka Azadi Ka Amrit Mahotsav, kaba long ka jingpynthikna ba ka ri India kan lah ban pyndap ïa la ki jingdonkam ne ka Aatmanirbhar.
U la ïaroh ïa ka Shillong Law College bad ïa ka Positive Energy Art Foundation kiba la pynlong ïa ka jingpyni nam ïa ka lariti ban kyntiew ïa ka jingsaiñdur bad ka kolshor jong ka jylla bad jong ka thaiñ Shatei Lammihngi. U la pynshlur ruh ïa ki samla ba kin bteng ban rakhe ïa ka Har Ghar Tiranga ha kine ki snem ban wan.
U Meghwal u la pynbyrngia ruh ïa kito kiba ïashim bynta ha kane ka prokram ha kaba u la rwai ïa ka jingrwai ba u la thaw shaphang ka Har Ghar Tiranga.
Ka MLA jong ka East Shillong Constituency ka Dr. M. Ampareen Lyngdoh kaba la ïashim bynta ha kane ka prokram ha ryngkat kiwei kiwei ki kynrem ki lyndam, ka la kyntu ïa ka Sorkar ba kan ai jingithuh noh ïa ka ktien Khasi bad Garo ba la dawa ban pynrung ha ka khyrnit Baphra jong ka Riti Synshar ka ri India.
Ka la ong ba ka sngewkmen haduh katta katta halor ka sienjam jong ka Sorkar ba ai jingtip ïa ki samla shaphang ki khlawait ki bym shym la paw pyrthei. Ka la ong ruh ba ka ngeit ba ka jylla Meghalaya ryngkat lang bad ka ri baroh kawei, kin pynthikna ba ka India ka kot sha ka thong Aatmanirbhar.
Ha kane ka sngi u Meghwal u la sam ruh ïa ki khusnam sha ki nogjop ha ki jingïakop bapher bapher ba la pynlong ha kane ka tamasa.
La bud pynshongkun ïa kane ka sngi, da ki jingshad tynrai na ki jylla bapher bapher jong ka thaiñ Shatei Lammihngi.