Nongstoiñ, Lber 29: Ka ophis jong ka Nehru Yuva Kendra Sangathan Nongstoiñ West Khasi Hills District, lyngba ka Ministry Of Youth Affairs and Sports jong ka sorkar India, kum shi bynta ban ai mynsiem bad ban pynshlur ïa ki jingtrei shitom jong ki samla, ka la ïoh ban sam ïa ki khusnam sha ki samla jong ka thaiñ West Khasi Hills District, kaba kynthup ïa kiba na ki club bapher bapher jong ka thaiñ kiba la ïashimbynta ha ki kam bapher bapher ha ka imlang sahlang.
Kawei na ki club kaba shah jied ban khur ïa katei ka khusnam ka dei ka Mawrusyiar Youth And Cultural Club, ha kaba ka la ïoh ban pdiang ïa ka khusnam kaba la tip kum ka District Best Youth Club Award 2021-22 bad ïa katei ka khusnam la sam da u bah P.D.Sangma khlieh duh ka West Khasi Hills District.
Katei ka club jong ki samla na ka shnong Mawrusyiar, ka la ïoh ban pdiang ruh sa kawei pat ka khusnam kaba la tip kum ka State State Level Outstanding Youth Club Award bad ïa katei ka khusnam la sam da u bah P.B War Nongbri, Assistant Director Sport and Youth Affair, Government of Meghalaya ha kajuh ka por kum u shong knor jong ka State Level Selection Committee.
Kitei ki ar tylli ki khusnam ki kynthup ïa ki Syrnod bad ka song pisa kaba la kot sha ki 1 lak tyngka lada kheiñ kyllum lang. La ong ruh ba ïa ki kam kaba kitei ki samla ki la leh, la phah sha ki bor kiba halor kiba dei khmih ïa ka National level selection ban ïakhun sa ïa ka National Level.
Kumban shu pynkynmaw ba ki kam kaba kitei ki samla ki la ïashimbynta ki kynthup ïa ka Covid 19 Emergency Relief Fund and Food Distribution ha ka por jong ka jingwan lyngshop ka khlam Corona, ka District Youth Convention, ka Fit India Freedom Run, ka Training on Youth Wellness and Positive Life Style and Fit India bad kiwei kiwei pat ki kam.
Haba ïadei bad kane ka phang na ka liang jong u bah D. Rapsang Deputy Director Incharge District Youth Officer Nehru Yuva Kendra Sangathan Nongstoiñ u la ong, “Ngi pynpaw ïa ka jingsngewkmen ba ki khun shnong jong ka Mawrusyiar, ki la kynjoh sha kane ka thong ban ïoh pdiang ïa kane ka khusnam. Kane ka la long kawei na ki nuksa kaba bha na ka bynta kiwei pat ki khun samla jong ka thaiñ, ba kin bud ïa kaei kaba ma ki ki la leh. Kumta ngi pynshlur bad ngi ïawer ruh ïa kiwei pat ki club ba kin mih shakhmat ban wan ban ïashimbynta lang ha kum kane ka rynsan”, ong utei u ophisar.
