Shillong, Nailur 2 : Ka sorkar ka sngewsynei ïa baroh ki nongtrei Casual kiba trei la bun bun snem ha MeECL, kiba duna eh ruh 10 snem kumta kan sa pynkhem hi ïa baroh kiba la trei tang shu la bit la biang ka pisa namar ïa mynta ka tnad ka dang don hapdeng ki jingeh ha ka liang ka pisa tyngka, ong u Symbud Myntri Rangbah uba peit ïa ka tnad Power ha ka jylla u bah Prestone Tynsong.
U la ïathuh ba ki don palat 1000 tylli ki post kiba lait ha ka tnad MeECL hynrei ka daw ka long bym pat biang ka pisa tyngka kumta ym pat lah ban thep bad pynskhem ha kitei ki post, tang shu la lah ka MeECL ban ïeng ha la ki kjat ïa kitei ki post baroh kiba lait ym pynskhem da kine ki casual kiba la don lypa mynta.
ïa kane ula ong hadien ba ki nongtrei Casual jongka MeECL hapoh ka lama MeECL Progressive Workers Union (MePWU) ki la pynlong ka jingïakhih da kaba deng lama ïong ha kine ki khyndiat sngi naka bynta ban dawa pynskhem ïaki bad pyllait ruh ïaka arear jongki.
U Symbud Myntri Rangbah ula kyntu ïa ki nongtrei Casual ban ïai shah shipor bad ka MeECL khnang ba tang shu biang ka fund yn ïoh ban pynskhem lut noh ïa baroh. “ Ka jingkyrpad jong ki nongtrei Casual ka long kaba dei eh, nga sngewthuh haduh katno ki don ka jingsyier namar wat hadien 15-18 snem ba la trei ruh ym pat shah pynskhem nalor ba ki dor ki mur ki la nang kiew ha ki ïew ki hat hynrei nga kyrpad ïaki ban ïai shah shipor tang shu la biang ka pisa khlem pep yn pynskhem beit ïaki khamtam hadien ba la dep siew ïa ki ram ba dei ban siew dep baroh” ong u bah Pretone.
“ Mynta ngi pyrshang ban lah ban ïeng ha la ki jong ki kjat bad tang shu la biang ka MeECL ka jingkular ka long ban pynshkem beit ïa baroh ki nongtrei Casual” . Pynkut u bah Prestone Tynsong.
