Shillong, Lber 29: Ka Nongthymmai kala khur pura ïa ki lai point ha ka lympung ïalehkai First Division bala pynïaid da ka Shillong Sports Association (SSA). Kane kala wan hadien ba kala pynliem noh tang da 1 kol pyrshah ïa ka Smit SC ha ka jingïakhun ha ka sngi Ba-ar ha madan MFA, Polo, Shillong.
Ïa katei ka shi kol la thep da u Mohan Gurung ha ka jingïalehkai jong ka kylla miet (69min), katba ka Smit watla kala ïakhun tyngeh hynrei haduh kaba kut ka khlem lah ban pynphai kylla bad mad noh ïa ka nam rem.
Ka jingïalehkai mynta ka Balang kan long hapdeng ka Nongrim Hills SC pyrshah ïa ka Imson SC ha ka por 3:30 baje janmiet.
