Shillong, Lber 29: Ka Umiam Eagles kala khur jingjop da kaba pynliem da hynriew wicket pyrshah ïa ka Simsang Sharks ha ka jingïalehkai bala ïaid arsngi jong ka lympung ïalehkai Semior Men Challengers Cup ba pynïaid da ka Meghalaya Cricket Association ha ka sngi Ba-ar.
Hadien ka jingshah pynthut ha u slap ha ka sngi Nyngkong, ha ka sngi Ba-ar pat ka jingïalehkai kala ïaid beit bad tang khyndiat la hap ban pynduna ïa ki over ïalehkai da mar hynñiew over kawei ka liang.
Ka Umiam Eagles kala ailad tied nyngkong ïa ka Simsang kaba la kamai tang 133 ron hap noh baroh ki wicket ha ki 40.1 over, katba ka Eagles kala lah ban poi sha ka thong bad jop tang ha ki 24.1 over.
Ka madan ïalehkai ka kham thud khyndiat na ka daw ka jinghap slap ha ka sngi Nyngkong, hynrei watla katta ruh ki rangtied ka Sharks kila lah ban tied bha ha kaba hynriew ngut ki rangtied kila kamai 20 ron tam hynrei ym don uwei ruh u ban kamai tam ïa ka 28 ron kumba la kamai da u Amiangshu Sen, bad ka jingkamai ron lang kaba bun eh kadei da 45 ron kata lyngba u Sen bad u Wallambok Nongkhlaw (21).
U Biswa u ïoh khur 3 wicket ai kamai 27 ron, u Elchiang Ch Momin 2/8 bad u Aditya Singhania 2/13. U Aditya Singhania u la lah ban kawang bol bha ha kaba khlem ai kamai ron ha ki saw over napdeng ki khyndai over.
Haba beh ïa katei ka thong, ka Umïam Eagles ka la lah ban tied bha ha kaba u Biswa bad u Bamanbha Shangpliang, kila la kamai ron lang da 87 ron. U kapten jong ka kynhun u khyrwit lai tylli ki six bad saw tylli ki four ha ka jingïoh kamai ba 49 ron na ki 40 bol, katba u Shangpliang u kamai 49 ron na ki 69 bol bad neh haduh kaba kut ka jingïalehkai kaba kynthup ïa hynriew tylli ki four
U Shaisngi Lyngdoh u ïoh 2 wicket ai kamai 25 ron, hynrei ka Eagles ka khlem duh mynsiem ha kaba u Shangpliang u la lah ban kamai ron bad ïarap ïa ka kynhun ban khur jingjop.
Ka Simsang Sharks kan ïakhun pyrshah pat ïa ka Myntdu Lions ha ka 30 Lber ha ka por 9 baje mynstep.
