Shillong, Nailur 01: U Symbud Myntri Rangbah ka jylla ha ka 31 taik Nailur u la pyntip ba na ka liang ka sorkar pdeng ka la pynlait ïa ka song pisa sha ka sorkar jylla na bynta ka tulop ki nonghikai SSA ïa kane u la ïathuh sha ki nongkitkam jong ka Meghalaya SSA Schools Association(MSSASA) ha ka jingleit kynduh bad u.
U Babu Aristotle C Rymbai President ka MSSASA u la ïathuh ba na ka liang ka sorkar jylla ba kat kum ka jingïathuh u Bah Prestone kan pyrshang ban pynlait noh sa ïa ka pisa na ka bhah jong ka kaba kot kumba 30.26 klur eiei hadien ba na ka liang ka sorkar pdeng ka la pyllait ïa ka pisa ba 272 klur na bynta ban siew ïa ka tulop ki nonghikai SSA.
Haba ïadei bad ka jingdawa ki nonghikai SSA ba ka sorkar kan siew ïa ka tulop sha ki nonghikai man ka lai bnai na ka liang u symbud Myntri Rangbah u la ïathuh ba ki tnad ba dei peit ïa kane ki la leh ïa ka bynta ban pyntreikam ïa kaei kaba na ka liang ki nonghikai SSA ki la ïakren ha ka jingïakynduh ha ka 21 tarik Naitung. Shuh shuh u la ïathuh ba u Symbud Myntri Rangbah u la ong ba na ka liang ka sorkar jylla kan hap ban kyntiew ïa ka Corpus funds ban pynïaid beit ïa ka jingpyntreikam ïa ka jingsiew tulop ba shisien lai bnai.
U la ong ruh ba na ka liang ka sorkar ka kular skhem ba ïa ka jingdawa ban kyntiew ïa ka tulop jong ki yn ïatai ha ka “State Education Commission” shen kaba ka sorkar kan thaw.
