Khliehriat Nailur 01:Ka kynhun jong ki nongkhaiï kiba hapoh ka shatri jong ka East Jaiñtia Mineral Supplier Export-Import Association ba la lam khmat da u President u bah Wanshwa Nongtdu, mynta ka sngi ka la pdiang burom ïa u bah G.Warjri uba la wan shimti ïa ka kam kum u Additional Deputy Commissioner jong ka East Jaiñtia Hills District, ïa ka jingpdiang burom la leh ka ka kamra ophis jong u ha ophis jong u Deputy Commissioner ha Khliehriat.
Kumba long mynta ka East Jaiñtia Hills District ka la ïoh ar ngut ki ADC ba kynthup u bah Jonathan Shylla bad u bah G.Warjri kiba dei ki MCS.
Na ka liang katei ka Association, ka la kyrpad ïa utei u heh sorkar, u bah G.Warjri ba un ïaleh shitom ban ïarap ban nang ïai pynkiew shuh shuh ïa ka district kaba hapoh ka jingpeit bad jingiatreilang jong u Deputy Commissioner u Abhilash Banarwal, IAS, khnang ba ka East Jaiñtia Hills District kan long ka district ka ba kiew shaphrang ha ki bynta ba pher ba pher, kiba long na ka bynta ka jingbit jingbiang jong ki paidbah jong ka district.
Ha kajuh ka por, la ong ruh ba na ka liang ka Association ka long la kloi ban ai ka jingkyrshan bad jingiatreilang bad ki heh sorkar jong ka district bad ka ai ruh ka jingkhublei kitbok kitrwiang ïa u bah G.Warjri ba un nang lah ban trei kham bha ïa ki kam hapoh kane ka district.
Ka EJMSEIA, ka kynmaw ieid ïa u bah G.Warjri namar ba une u heh sorkar u dei uba la trei teng ha East Jaiñtia Hills District myn ha ki snem kiba la leit ha kaba ha u snem 2015 u la wan ban long kum u Block Development Officer jong ka Saipung C&RD Block bad mynta pat u la wan ban long kum u ADC hapoh kane ka district.
