Nongstoiñ, Nailur, 1: Ka ophis jong u Block Development Officer ka Nongstoiñ C&RD Block lyngba u Cluster Coordinator u Bah C.C Diengngan, ha ka sngi palei u la leit ban thaw bad pynskhem ïa ki 11 tylli ki Self Help Group (SHG) hapoh ka shnong Mawlaisyiem, kaba dei ka jaka khappud hapdeng ka jylla Meghalaya bad Assam. Kitei ki 11 tylli ki kynhun SHG ki dei beit kyrpang tang na ka bynta ki kynthei.
Na ka liang jong kitei ki dkhot SHG, ki la pynpaw ba lyngba ka jingthaw ïa kine ki kynhun, ki buh jingkyrmen ba kin nang lah ban kyntiew ïa ka rukom im jong ki ha ki nongkyndong. Khamtam ban kyntiew ïa ka rep ka riang, namar ba baroh ki nongshong shnong ha katei ka dong ka thaiñ ki ju im tang lyngba ka rep ka riang bad ka ri jingri.
La ïathuh ruh ba na ka liang u Cluster Coordinator u bah C.C Diengngan, u la pynshlur ïa ki longkmie ba kin mih shakhmat, ban long ki nongkitkam bad ki dkhot ha ki SHG. Namar na ka liang jong ka sorkar ruh ka don ïa ka thong ban ïarap bad ban kyntiew ïa ka rukom im ki longkmie ha ki nongkyndong lyngba kitei ki SHG.
U la ong ba hadien ba kine ki SHG ki la treikam bha, yn sa shna ïa ka ïing ne ka ophis jong ka Village Organization (VO) ïa ka ba ki SHG ki lah ban pyndonkam ha kano kano ka por ba donkam. Na ka liang ka ophis kan sa pynïoh ruh ïa ka jingïarap sha kitei ki kynhun ba kin pyntyllun shakhmat ïa ka kam jong ki.
Ha katei ka sngi ba thaw ïa kitei ki SHG la ïadonlang ruh ki nongïalam shnong, ki riew rangbah, ki nongtrei napoh ka Block ophis bad kiwei kiwei.
