Nongstoiñ, Nailur 1: Ha kawei ka jingiia kaba dang shen kata ha ka miet jong ka sngi Hat Majai jong kane ka taïew kaba 30 tarik u Nailar, kawei ka samla na kawei ka shnong ha West Khasi Hills kaba la buhrieh noh ïa ka kyrteng, ka la leit sha ka jingkhawai dap snem ïa ka jingkhlad noh jong u bahaïing ha kawei ka shnong, hynrei kam shym la wan poi sha ïing haduh ka por shiphew baje mynmiet.
Na ka liang ki bahaïing ki la pyntip sha ki rangbah shnong bad ki nongshong shnong ki la ïa mih ban leit wad ïa ka hynrei kim shym la lap satia. Hadien katto katne por, uwei u briew ia uba la kynnoh ruh ba u dei u samla jong kane ka khynnah samla u la pyntip ha ki baha ïing ba u la ïohi ba lai ngut ki samla shynrang bym pat pynpaw kyrteng ki la patan jubor ïa katei ka samla sha khlaw.
Ki bahaïng ryngkat ki paitbah shnong mar ïa ïoh jingtip ki la leit phah wan ïa ki hakhmat ka Dorbar bad ha ka jingtohkit bniah, ki la ïathuh ba ha ka miet 30 tarik hadien ba ki la wan phai na ka jingkhawai dap snem, katei ka samla ka la leit on lynti ïa u paralok jong ka bad la synran lang da u samla jong ka. Ha ka por ba ki wan phai uwei uba donkti u la wan ap lypa ha shiteng lynti bad u la patan jubor ïa katei ka samla sha khlaw bad u la leh beijot, katba u arngut kiba don lang ki la phet noh na katei ka jaka.
La kynnoh ruh ba utei u jong katei ka kynthei u la leh beijot ïa ka la bunsien ha ki taïew bad ki bnai ba ladep.
Hadien ba ki rangbah shnong ki la dep tohkit ki la leit ban aiti noh ha ki Pulit bad ïa ka mokutduma la register ha ka Mawshynrut PS C/NO 15(08)2022U/S 341IPC R/W SEC .3(a)/4 POCSO Act bad ki Pulit ki dang pynlong ia ka jingtohkit ïa kitei ki runar ka dang ïaid shakhmat.
Halor kane ka jingjia ki paidbah nongshong shnong ki la pynrem jur ia ki runar kiba donkti ban leh ia kane ka kam kaba pynsuhjer bad kaba pynrit mynsiem ia ki samla kynthei ha ka shnong ka thaw naba kane ka jingjia ka dei ruh kaba la jia ha ka por bym poi pyrkhat.
Ki paidbah ki la dawa ia ki bor jong ka aiñ ba ki dei ban pynshitom da kaba tyngeh ia kiba donkti bad ban pynshitom ia ki katkum ki kyndon jong ka aiñ khnang ba kan long ka jingsneng ia kiwei pat.
