Shillong, Nailar 31 : Ka sorkar pdeng ka la pyllait haduh 272 klur tyngka na ka bynta ban pyntyllun beit ryntih ïa ki skul SSA kiba don ha ka jylla, ong u Myntri ka tnad Pule Puthi ka jylla, Bah Lahkmen Rymbui.
“Ha ki 10 sngi mynshwa, ka sorkar jylla ka la mang haduh 272 klur tyngka sha ka sorkar jylla bad ïa kane ka pisa yn sa pynpoi noh myta ka taïew. Kumta mar ïa ïoh ïa kane ka pisa, ngi lah ban pyllait noh ym tang ar bnai ka tulop ba dang sah jong ki nonghikai SSA hynrei haduh 3-4 bnai ruh,” u la ong.
Halor ka jingkylli, u Myntri u la ong ruh ba ka sorkar kam pat shim kano kano ka rai halor ka jingdonkam ban don noh ki lad ki lynti bna pyntikna ba ki nonghikai ki lah ban ïoh ïa ka tulop ha ka por kaba biang.
Ka sorkar ka don eh ka jingthrang hynrei namar ba ka SSA kadei ka skim kaba kyrshan da ka sorkar jylla kumta ngi hap ban ap na ka sorkar pdeng ban ïoh ïa ka pisa,” u la ong.
Dang ha ka 21tarik mynta u bnai ki la don haduh kumba 12,541 ngut ki nonghikai hapoh ka lama jong ka MSSASA ki la weng noh ïa ka jingïakhih hadien ba ka sorkar jylla ka la pynbna ba kan pyllait noh ïa ka pisa ba 122 klur tyngka naka bynta ban siew noh ïa ka tulop ba sah teng kaba la poi haduh saw bnai.
U Myntri u ong ba ka tnad pule puthi ka sngewnguh ruh ïa ka tnad Pla tyngka namar ka jingmang pisa na ka Corpus Fund ha u bnai ba la dep. Tangba u ong pat ba ïa katei ka pisa kin hap ban pynphai noh ha kine ki khyndiat por ban sa wan.
