Shillong, Nailar 31: Ka Ïing Bishar Meghalaya High Court ha ka sngi Balang ka la bthah ïa ka sorkar jylla ban ai ïa ka kaiphod hapoh 10 sngi ka ban pyni ïa ka por haduh katno kan shim na bynta ban shna ïa ka Compost Plant bad kiei ki jingïarap ba ka la ai sha ka Jowai Municipal Board ha kaban weng ïa ka jingeh kaba mih na u ñiut ha sor Jowai.
Ïa kane ka hukum la pynmih da ka iing bishar kaba la shongbishar da u Chief Justice Sanjib Banerjee bad u Justice W Diengdoh halor ka mukotduma PIL ba la ujor da ka Synjuk Ki Waheh Shnong Jowai.
“Kane ka kam yn sa bishar biang hadien 10 sngi hadien ba ka sorkar kan aiti ïa ka kaiphod lyngba u ophisar ba katno sngi kan shim por ban tei ïa kane ka Compost Plan” ong ka hukum.
“Ka long ruh kaei kaei kaba ym lah pdiang ba ki jaboh kin kynton ha ki lynti synkien bad ki rud ïing rud sem khamtam eh hadien ka aiom lyiur” ong shuh shuh ka hukum.
Na ka liang ki nongujor ki la ujor ruh ba ki jaboh jabaiñ ki la sdang biang ban lang bad ka dei ka kamram jong ka sorkar ban shim biang ïa ki lad ki lynti ban weng ïa kane ka jingeh ki nongshong shnong ka Jowai.
Ïa kane ka mat ka ïing bishar ka la buh ban shong bishar biang ha ka 14 tarik Nailur.
