Shillong, Nailar 31: Hadien ba ka khubor ba ka seng United Democratic Party (UDP) na Pynursla kam shym la ïoh kyrtong satia ban pynïakhun ha u snem 2023 pyrshah ïa u bah Prestone u MLA ba mynta ka thaiñ na ka liang ka UDP Pynursla Circle ka la kyntait war ïa kane ka khubor da kaba ong ruh ba kaei kaba la mih ha kawei na ki kot Khubor, ka dei ka khubor lamler kaba pyrshang ban ïalam bakla ïa u paidbah ban ban pynkulmar jingmut ïa ki nongkyrshan ka party na kane ka thaiñ.
Haba u Mawphor u ïakren bad u President ka UDP Pynursla u Bah Aihok Khongmalai u la ong ba ka khubor kaba kam ba ka UDP kam ïoh kyrtong ka dei ka khubor kaba jngai bah na ka jingshisha. “Kumba long mynta ki don lai ngut kiba wan pan tiket na ka UDP” u la ong.
U la ong ruh ka jingbym pat lah ka UDP Pynursla ban rai ïa ka kyrteng ban phah sha ka state Election committee ka dei namar ki dang pyrkhat bad wad jingtip bha mano napdeng kine kiba pan tiket kiba biang tam ban ïakhun kum ki kyrtong ka UDP.
“Na ka liang ka party ha Pynursla ngi la pynkhreh bha mynta shaid shaid ban sei ïa u kyrtong u ba biang bad uba don ruh ka jingkyrmen u ban lah ban pynliem lyndang ïa u MLA ba mynta ka Pynursla, namar mynor ka ka Pynursla Constituency ba ju tip kum ka Lyngkyrdem constituency ka dei ka constituency kaba ju bat da ka party riewlum da ki bun bun snem naduh ka por u Bah (L) B.B. Lyngdoh ” u la ong.
“Kum ban shu pynkynmaw dang ha kane ka election MLA ba la dep (2018) ka party ka dei kaba wan ba-ar, ha kaba u Sitting MLA ba mynta ula pynrem ïa u kyrtong ka UDP tang khyndiat vote. U MDC ba mynta jongka Langkyrdem Laitkroh ruh u dei na ka party UDP. Ka Final ba ju ïaleh hi ha man ka election ha Pynursla ka long beit ba ka party UDP ka poi phainal. Kumba long mynta ngi dang bishar bniah ïano yn pynïakhun khnang ba ha kane ka kynti ba mynta ka party kan ïoh ban bat biang noh ïa katei ka Seat kumba ju long mynshuwa”, u la bynrap shuh shuh.
