Ka surok na Laitkor sha Malki bad Lumparing kan pynduna dheng kali ha Shillong: Lambor

Shillong, Nailar, 31: U Bah Lambor Malngiang, MLA bad MDC ka Nongkrem Constituency u la ong ba ban weng ïa ka jingdheng kali ha nongbah Shillong ka long kaba donkam ba ka tnad PWD (Roads) ka Sorkar Jylla ban phai khmat bad shna ïa ka surok na Laitkor ka ban mih sha ki bynta ka Malki bad Lumparing.
Da kaba pynpaw ba ki surok ban pynïasnoh na kawei ka shnong sha kawei pat kin ïarap ban pynduna ïa ka jingdheng kali, u la ong ba kane ka dei kawei jingtyrwa jong u kum u nongmihkhmat nalor ki projek surok kum na Pomlakrai sha Upper Shillong kaba dang ïaid sha khmat bad ka surok na Mawnarian sha sha Hynñiew Mer.
Kane ka jingkren une u nongmihkhmat ka long hadien ka jingwan jurip ïa ka bynta surok ha Sawlad kaba la i donkam ban pynheh namar ka jingkhongwain jingkhim jong ka bad kaba la wanrah jingeh kat nang mih ki por ki sngi khamtam ïa ki kali ki ba dei ban mih ban rung na lane sha ki thain Lapalang.
Halor kane, u la ong ba na kane ka bynta surok ka mih ka jingdheng kali kaba jur bha kane ka thain haduh Nongthymmai, Madanriting shaduh ki bynta ka Mawblei haduh Laitkor.
Ha kane ka jingwan jurip ïa kane ka bynta surok la ïa donlang da u Bah Ian Onel Swer, Additional SP (Traffic) East Khasi Hills, u Bah Loyal Airfield Kharbyngngar nalor kiwei pat. Une u nongmihkhmat u la ong ba un khot ïa ki ophisar ka tnad PWD ban wan jurip lang ha ki khyndiat sngi bad ban wan ban thaw ki lad ki lynti halor kane ka jingthmu.
U la ong ruh ba ki jingkieng surok ha Demthring bad Nongthymmai ki la rim bad la donkam ban shna ïa ki namar lada ki dkut kan long ka jingeh kaba khraw ha ka leit ka wan ki paidbah. Halor kane ruh u la ong ba un sa ïakren lang bad ki bor ba dei peit ïa ka tnad PWD Roads.
U la ai khublei ïa ki bor pulit kiba don bynta ha ka kam pynïaid kali ha nongbah Shillong kiba kynduh ïa ki jingeh bapher bapher namar ka jingkhapngiah bad khim ka surok.
Na ka liang, u Bah Ian Onel Swer u la ong ba kat nang mih ki sngi ki nang bun bad tuid sha nongbah Shillong ban wan la ki jingdonkam bad wanrah ka jingkhapngiah kaba jur ha ka por mynstep bad por janmiet.
Halor ka jingai jingïatreilang ki paidbah, u la ong ba na ka por sha ka por ka don ka jingïakynduh ïa phylliew jingmut bad ki nongñiah kali bad pynlong ki prokram ai jinghikai bad ka tnad hi ka iit ki lad ki lynti ban pyllait na ka jingdheng kali.