Nongstoiñ, Nailar, 31: Hadien ba ka jingud ki Nongrep ïa ka jingbam khñiang ki kba, ka Hills Farmers Union HFU West Khasi Hills ka la hiar ha ki lyngkha kba, la ïohi ba shisha ki khñiang kiba khot ki Ñiangblu (Paddy Blue Beetle), ki la sdang bam ïa ki kba kylleng ki jaka naduh madan Riewblei, madan Langlieh, madan Mawkhmah, madan Myrhoi, ha thaiñ Langpih bad kiwei ki jaka.
“Kum ki nongrep ngi lap u ne u khñiang u la don lypa ha ki kba naduh bnai Naitung. Hynrei ha u bnai Nailar naduh ka taiew ba ar ei ei, la ithuh u la sdang bam ïa u kba. Ngi la pyrshang ban ai dawai synreit, hynrei don kiba ïap bad bun ruh kiba dang sahkut bad bteng ban bam ïa u kba”, ïathuh u Bah Lumlang Kharsyiemlieh nongïalam ka HFU West Khasi Hills.
“Na ka liang ka HFU ngi la ïathuh ïa kane ha ka Office u DAO bad hapoh ka jingïalam u Sir Phawa, u la phah ïa ki nongtrei ban leit jurip, ha kaba ki la pynpaw ka jingdonkam ban synreit noh da ka dawai Bio Pesticide BABA kaba khleh lang bad ka um”.
“Nga kum u General Secretary ka HFU West Khasi Hills nga sngew ban kyntu ïa baroh ki para nongrep kba, ba wat pynslem shuh hynrei sngewbha leit shim noh ka dawai BABA na ka Office u District Agricultural Officer lane ïakynduh ïa u Sir Phawa lane ïa ki Nongtrei. Kane ka dawai dei ban khleh lang bad ka um, sa synreit da kane ka dawai, khnang ba kan ïarap ïa u jingthung bad kam don jingktah ïa ka jingkoit jingkhiah”, u la ong.
U Bah Lumlang u la ïathuh ruh ba naduh u snem 2019 la lap ïa u ne u khñiang ba u pynjot ïa ki kba. Kumta lada ym ai dawai kan ktah noh ïa u tynrai kba bad um sei soh shuh. Katkum ka jinglap jong ki Nongrep, lada ai naduh bnai Naitung haduh Nailur ka dang ïarap. Hynrei kaba eh ban ai ha u bnai Naitung, Nailar haduh u Nailur taiew ba nyngkong ba ar bad bha eh da ai mynstep bad janmiet bad ha ka por ba rang ka suiñ bneng.
“Ngi kyrpad ruh ïa ki Nongrep ban rah Xerox ki EPIC bad Passbook ban leit shim dawai bad ban ngi kyrpad ïa ki ka Office ban pynbiang ki dawai bad ïarap lang ïa ngi ki Nongrep” ong u Bah Lumlang Kharsyiemlieh General Secretary HFU WKHD.
